Pensyon sa beterano

Ang Philippine Veterans Affairs Office (PVAO) kusganong miduso sa hangyo sa mga beterano sa WWII nga umentohan ang ilang pensyon matag buwan.

* * *

Ang mga beterano, kinsa nagpangidaron na og 90 ngadto sa 98 anyos, nagdawatan ra og binuwan nga pensyon nga kapin ra gamay og P5,000. Matud pa sa usa ka apo og beterano mas dako pa ang SSS pensyon sa usa ka empliyado nga naglingkod ra sa opisina.

* * *

Diha say usa ka beterano nga mitug-an nga wa pa gani moabot ang iyang pensyon nagasto na niya sa loanshark. Ang kadaghanan adto modagan sa lending office aron mo cash advance.

* * *

Luya na kaayo ang panglawas sa kadaghanan sa atong mga beterano sa WWII. Naay mga magsungkod na, may mga magkratsis, naay mag-wheelchair. Dili na makadaug og pas-an sa pusil nga ilang giyano-yano la’g pas-an didto sa Bataan o Corregidor.

* * *

Adtong miaging kasaulogan sa Araw ng Kagitingan, daghang pundok ang mihatag og pasidungog sa atong mga beterano. Apan matud pa sa mga istambay sa usa ka baberya sa may Taboan: “Makaon ba sa beteranong gigutom ang pasidungog gikan sa baba?”

* * *

Nag-anam na’g awop ang adlaw sa mga beterano. Angay nang dalion paghatag kanila sa ilang mga panginahanglanon samtang mapahimuslan pa nila.

* * *

SA LAING BAHIN ... Greetings sa Banat News readers sa paradahan sa jeep ug traysikol sa Talisay ug Minglanilla. Daghan salamat sa nagpadayon ninyong suporta sa Banat News.