Gipili sa Dios ang mga kabus
Giunsa kaha sa mga pilit og kamot ang mga kahoy sa center island sa S. Osmeña Avenue human bugwala, giraha kaha para sugnod? O gidapat ba sa balay?
Ang DPWH nanghunaw ra ba niini tungod kay sila ang nagpasiugda sa maong proyekto apan WT Construction ang nagtrabaho.
Kun gisugo sa DPWH ang maong kontraktor sa pagbugwal og apil sa maong mga kahoy, aw tataw kaayo nga manubag usab sa maong sala ang maong ahensya.
Apan kun mga tawo ra sa WT Construction maoy nagbuot-buot sa pagpanghilabot, aw sigurado gyud nga masikwati ang tagdumala sa WT ilabi na karong gikiha na kini sa DENR.
* * *
Ang CICC pila pa lang ka tuig nga nagbarug sa yuta sa Mandaue nahimo na kunong “white elephant�
Pastilan himabaw sa P1 bilyon ang gasto niini sa kagamhanan sa lalawigan unya tungod kay mga substandard ang mga material nga gidapat, dali kaayong nangliki ug nakuyat-ag dihang gitay-og sa linog.
Kadako kaha og ginansya sa kontraktor niini no? Aw daghan man sab gud ang mangomisyon, busa pildi lang ang magkonsimisyon.
Pastilan ang uban miingon nga angay untang linogon og una ang kontraktor nga migamit sa mga substandard nga materyales.
Apan daghan usab ang miingon nga mao kini klase sa mga proyekto nga iya sa gobyerno, postura lay nindot apan ang mga dapat laksut.
* * *
Si senador Jinggoy Estrada mibahad nga di siya mamili og prisohan. Kini human mabati ang sugyot ni senador Miriam Santiago nga ipatipon sila sa mga ordinary o kaha banggiitang kriminal.
Aw hinuon unom ra man kuno ka tuig ang serbisyohan niya sa prisohan.
Pastilan kadaghan baya sa kuwarta nga nasikmoy nila gikan sa panudlanan sa nasud no?
Daan na nga kuwartahan , unya napun-an sa kuwarta nga pinaspasan, pastilan kining kuwarta mao gyu’y makapaimperno sa tawo. Mao bitaw nga ang Dios mabinantayon kaayo sa iyang mga anak, busa gipili Niya ang mga kabus nga mag-alagad Kaniya sa tinarong.
Kay nasayud siya nga ang mga kuwartahan ug adunahan di na makahinumdom sa pag-alagad Kaniya, kay ang kuwarta mao nay ilang gi-Dios.
* * *
- Latest
