Pagpabarug og simbahan
Tapilon, Daanbantayan--Atubangan sa kalapad sa kadaot nga gibilin sa bagyong Yolanda sa amihanang Sugbo, ang naggusbat nga mga simbahan maoy nakadapit sa pagtagad ni Dr. Jose “Sir Dodong†Gullas sa University of the Visayas ug JRG Halad Foundation. Nipasalig siya ni Cebu Archbishop Jose Palma nga motabang pagpabarug pagbalik sa mga simbahan.
Unang nakadawat sa tabang ang parokya dinhi ni San Miguel Arcangel. Kansang kabahin sa atop ug kisame nahugno. Naatopan dayon niadtong Disyembre. Maong bisan sa kusog nga bunok sa uwan luwas ug uga ang mga molupyo nga nakatambong sa tibuok Misa de Gallo. Ang mas lisod ug kutas nga trabaho pagbanhaw sa katahom ug kabantogan sa simbahan nahingpit karong buwana.
* * *
Si Arsobispo Palma ang nangu sa kaparian sa nagkalainlaing parokya sa amihanang Sugbo pagbendisyon sa simbahan ug pagsaulog sa Santos nga Misa. Nga bisan gipahigayon sa kasarangang adlaw nga tingtrabaho gipunsisokan sa gatosan ka mga hamtong ug kabataan. Nakaduaw si Palma dinhi usa ka semana sa wa pang bagyo aron pagbendisyon sa bag-ong kumbento. Nga wa sab pasayloa ni Yolanda.
Giawhag ni Palma ang mga parokyano nga di angay’ng mawad-an og paglaom nga dunggon ang mga pangaliya sa dugang tabang nga makapahaw-as nila sa pait nga kahimtang. Gipasalamatan niya silang Sir Dodong ug Ma’am Nena Gullas sa bililhong gasa alang sa simbahan ug sa mga molupyo sa Tapilon.
* * *
Hangtod karon di pang katuo ang Kura Paruko, si Padre Fernando Sotto, nga mobarug nga mas matahom pa ang simbahan sud lang sa upat ka buwan. Giisip niyang grasya gikan sa langit ang way pagmakuli nga pagtanyag ni Sir Dodong pagtabang sa simbahan.
Di si Yolanda ang unang nipatagbo sa dan nilang Sir Dodong ug Padre Sotto. Dihang aktibo pang nagduwa og tennis si Sir Dodong sa Cebu Country Club usa sa ball boys nga nitabang niya nagdamgo diay og mas balaanong kinabuhi. Si Padre Sotto, nga taga Mabolo, Dakbayan sa Sugbo, nisud sa seminaryo dihang 18 anyos na nga wa magpaabot nga bangis nga katalagman ang moabot nila pag-usab.
* * *
Tapilon maoy usa sa labing naggusbat sa amihanang tumoy sa Sugbo. Mas naapiki ang kapin sa libo ka pamilya nga nagsalig sa pangisda tungod sa pagkaguba sa ilang mga bangka. Salamat sa daghang tabang gikan sa mga Sugbuanon ug katawhan sa ubang kanasuran, niangkon ang mga molupyo nga inanay nang nahibalik ang ilang mga panginabuhi.
Nagkinahanglan pa hinuon og dugang tabang ang mga biktima sa katalagman. Daghang salamat sa wa pa makalimot nila. Human sa pagbendisyon sa simbahan, nananghid si Ma’am Nena ni Sir Dodong nga mangadto sila sa kabalayan nga wa pay mga atop aron ma-apud-apod ang ilang gidala nga gatosan ka pligo sa sin.
- Latest
