Hinaut nga mapakong

Nahuman na gayud ang ikaduhang gradwasyon sa mga tinun-an sa Talisay City College. Apan ang pangutana, nahuman na ba usab kaha ang dakong kontrobersiya mugna sa giilogang posisyon pagka-presidente sa maong tunghaan?

Kahinumdoman nga grabe’ng pagyagaw sa sitwasyon sa liderato sa maong tulonghaan sa dihang gitudlo ni Talisay City Mayor Johnny de los Reyes si Paulus Cañete isip presidente sa TCC.

Apan daghan ang nagtuong sayop ang pagka-appoint ni Cañete. Kini tungod kay aduna may kasamtangang presidente, si Richel Bacaltos, nga gitudlo sa Board of Trustees sa maong tunghaan.

Tungod lagi kay dili niya tawo si Bacaltos, gusto ni De los Reyes nga hulipan kini. Ug iyang gibutang si Cañete nga maoy modala sa renda sa maong tunghaan. Apan matud pa, ilegal ang appointment ni Cañete tungod kay wala kuno kini mag-agi sa board, ang dunay katungod pag-appoint pagka-presidente.

Kini ang hinungdan sa nagyagaw nga pagdumala sa maong tulonghaan. Pulos dili paalkanse ang isig ka habig ug pulos duha ang desisyon alang sa usa lamang ka programa. 

Epekto sa ilang kagubot mao ang duha ka gradwasyon nga gipatuman sa TCC. Tiaw mo nang kaduha ang mga tinun-an nga mipaso aron lang gayud matuman ang gusto sa matag liderato.       

Di ba ang pagpaso pag-usab dugang pwerhisyo sa mga tinun-an ug sa  ilang ginikanan? Niining panahon sa kalisod, migasto na usab ang mga ginikanan og dugang salapi aron lamang makapaso pag-usab ang ilang mga estudiyante.

Pagkahanggaw lamang gayud. Klarong mga estudiyante ang biktima niining kaguliyang karon diha sa maong tunghaan. Sila maoy napagan niining walay hinungdan nga gubot mugna sa duha ka liderato.

Hinaut nga dili motagam ang mga lumulupyo sa dakbayan sa Talisay. Hinaut nga padayon nilang suportahan ang TCC pinaagi sa pagpa-eskuwela sa ilang mga anak sa maong institusyon. 

Labaw sa tanan, hinaut nga mapakong ang ulo sa mga nagpasiugda og kagubot sa maong tunghaan aron nga malamdagan sila ug makaamgo sa dili maayo nilang gibuhat.