EDITORYAL - Maghuwat pa og aksidente

Wala malilong sa kinabag-ang katawhan sa nasud ang gihimo ni Bayani Fernando diha’ng siya pa ang tsirman sa Metro Manila Development Authority (MMDA).

Gibungkag ni Fernando ang mga straktura nga gipangtukod sa aseras ug daplin sa karsada nga nakababag sa pag-agi sa katawhan.

Sigurado nga kadtong tag-iya sa mga ilegal nga straktura nga gipangguba ni Fernando nangasuko g’yud kaniya apan mas daghan ang mga tawo nga nangalipay kay sayon na lang alang kanila ang paglakaw sa aseras.

Dinhi sa dakbayan sa Sugbo dunay susama nga grupo nga gipangulohan ni Raquel Arce nga gitawag og Prevention Restoration Order and Beautification Enhancement (PROBE).

Apan molihok lang kini’ng mao nga grupo kun sugoon sa mayor ug dili mohimo og kinaugalingon nga kampanya pagpahapsay sa kadalanan.

Daghang mga naninda nga migamit na sa aseras ug ang mga tawo anha na molakaw sa karsada ug makabalda sa pag-agi sa mga sakyanan.

Pwerte’ng samoka ang aseras sa dalan B. Rodriguez duol sa main entrance sa ospital ingon man ang tindahan sa mga vendors nakapagamay sa karsada duol sa Barangay Hall sa Santo Niño sa dalan Legaspi.

Nganong wala man kini aksyoni sa PROBE ang mao nga abuso sa mga vendors nga ang ilang tahas mao man kaha ang “restoration” sa karsada, pagpahapsay ug pagpanindot sa dakbayan?

Dili tingali angay’ng maghuwat pa ang PROBE nga may tawo nga maligsan samtang maglakaw diha sa karsada usa pa palihukon ni Raquel Arce ang iyang mga sakop.