Ang mapugsanong tinguha

Si Henry ug si Zobel, suod kaayong managhigala nga labaw pa sa tinuod nga managsuon. Gisaw-an nila halos tanang kapaitan sa kinabuhi. Ang kalisud maoy ilang gihimong hagit aron pabaskogon ang nagkaluya nilang paglaom. Tungod sa pangandoy, hugtanon nilang gigakos ang kadasig sa paningkamot.

Dihang giugmad ang kanhi nilang pinuy-anan nga mao ang basurahan sa dakbayan nga karon usa na ka paraiso nga talan-awon. Nagkabuwag ang managhigala nga wala nay mga komunikasyon kay si Zobel milarga sa Manila, tungod sa kamatayon sa iyang inahan nga dugay nang nanimuyo didto . 

Og nangagi ang taas nga katuigan, aduna nay pamilya si Henry. Aduna siyay gamay nga buhatan sa sapatos. Kontento na siya , bisag monas ginhawa og kamas aron masustentohan ang nagkadakong panginahanglan sa pamilya niya.

Miabot nga wa damha, sa usa ka reunion sa hayskol nga gitambongan niya, nga ang dinapit nga mamulong..usa ka malampusong negosyante, mao si Zobel. Human sa maong okasyon, naghinangpanay ang suod nga magkababata. Gibatig kataha si Henry sa iyang higalang si Zobel, nga usa na ka bilyonaryo. Wa siya kapugong sa pagpangutana, ingon sa di siya makatoo sa kahimtang sa iyang amigo. " Bitaw bro, unsay sekreto nga naabot mo man kanang posisyon mo?"

"Bueno, adto ta sa baybayon mangaligo ta, kay didto pakit-on tika sa akong sekreto," matud ni Zobel. Sa didto na sila sa tagaliog nga tubig, giubog  ni  Zobel ang ulo ni Henry ilawom sa tubig nga haskang nagkapakapa kining buot molugnot aron di siya malumos. Unya inanay siyang gikawas, ug ni Zobel pa,"Unya, unsa may didto sa hunahuna mo dihang didto ka sa ilawom sa tubig?”

Miginhawa’g lawom si Henry una kini nitubag, “ Aw niutong ko nga nagtigom og hangin samtang mapugsanon kong nikapakapa aron dili ko malumos.”

“Oo, mao nay sekretong gihimo ko, ang mapugsanong tinguha nga di ko malumsan sa paglaom, nga hugtanon kong naabot karon ang akong posisyon.”