Wala’y pagpakabana

Pwerte kadaghan sa mga sakyanan nga magparada daplin sa Gorordo Avenue tungod nianang usa ka Wine Shop unahan sa Lahug Elementary School matag gabii.

Masi’g ka daplin sa karsada giparkingan sa naglumbay nga mga sakyanan. Ang lapad kaayo nga karsada nahimo na nga gamay ug bisi na kaayo ang mao nga dapit. Unsa, wala makakita niini ang kadagkoan sa CITOM?

Siyaro na man pud og nabutaan na lang mo sa mao nga talan-awon. Mata’g agi nako diha inigka-gabii, pwerte g’yud nga samoka kay ang usa ka “lane” sa karsada giparkingan man og mga sakyanan.

Nganong wala man ninyo himoi og lakang kini’ng mao nga abuso? Ayaw ko’g ingna nga ang tagdumala niini’ng mao nga Wine Shop nga sagad anhaon sa mga adunahan panahon sa gabii dunay proteksyon sa CITOM. Bi, palihug kuno sir Raffy Yap ug Joy Tumulak sa CITOM kay mora’g dili na g’yud kini maayo. Ang parking area niining mao nga Wine Shop alang ra sa duha ka sakyanan.

Kanus-a pa man kamo moaksyon, kun aduna na’y aksidente nga mahitabo diha? Mga sakop sa CITOM nga kanunay’ng mag-agian diha wala mo kakita niini nga problema? Naunsa gud tawon mo.

* * *

Wala did-i ang usa ka tawo pagpili kun unsa ang iyang magustohan nga tinuohan. Apan siyaro na man ‘sab, og dili sila makasabot nga gibinuangan ra sila sa tawo nga nagpatoo nga Ginoo.

Ang gipasabot nako mao kini’ng mga kulto. Maghinuktok bitaw ko kun giunsa kaha pagkumbinsir sa pangulo sa kulto ang ilang mga sakop aron lunod-patay sila nga molaban kaniya.

Tiaw mo, adunay mga ginikanan nga andam motugyan sa ilang mga maanyag nga anak-dalaga aron pahimuslan sa pangulo sa kulto kay kuno swerte nga ang ilang anak, gipamabdosan sa Ginoo. Pastilan tawon uy.

Mga silingan nako didto sa Bogo kaniadto, namaligya sa ilang katigayonan, kayutaan, balay ug kahayopan kay adto na mopuyo sa Surigao kay ang mikatap nga tabi-tabi maglunop na kuno niadtong 1976.  Wala pa ko malimot nga giingnan ko sa usa ka sakop sa kulto nga dili na kuno ko makahuman sa elementarya kay matapos na ang kalibutan.

Mao kadto nga ang mga sakop sa grupo nanglupad sa Mindanao, apil ang akong ig-agaw nga ilang nadani, karon wala pa gihapon ang kataposan sa kalibutan.

Diha sa Barangay Luz kaniadto, dunay pangulo sa kulto nga gidakop sa NBI. Nakuyog ko niadto pag-raid sa NBI ug dunay mga babaye nga na-rescue.

Sila maoy tig-trapo sa tiil sa pangulo sa kulto nga maghikap-hikap sa ilang kalawasan. Grabe! Gamita ‘sab tawon ang inyo’ng mga utok uy! Ayaw pailad!