EDITORYAL - Earth Hour

Daghan ang misalmot sa gipasiugdahan nga Earth Hour kagabii nga ang publiko namawong og suga ug mga appliances sulod sa usa ka oras, agi’g pagsuporta sa kampanya batok climate change.

Ipahigayon ang Earth Hour kada katapusang Sabado sa Marso matag tuig. Usa kini ka dakong kalihokan nga gipasiugdahan sa World Wildlife Fund for Nature nga apilan sa nagkalainlaing nasud sa tibuok kalibutan. Ang Pilipinas mi-apil sa pagsaulog sa Earth Hour sukad 2009, ug kini giila nga maoy “Earth Hour Hero Country” tungod kay kita ang labing daghan og mga sumasalmot nga siyudad o lungsod.

Bisan og usa ra ka oras nga magdungan og pamaw’ng ang tibuok kalibutan sa suga ug mga appliances sa  kabalayan ug mga opisina, dako na kaayo og natabang ang Earth Hour sa kampanya batok climate change. Ang pagpaw’ng sa suga, gawas nga naka-save og kuryente ug enerhiya, nakamenos usab sa carbon dioxide emissions nga maoy makadaot sa kalikupan.  Apan ang Earth Hour karong tuiga, dili lang pagkontra sa climate change ang tuyo. Gusto usab sa mga tigpasiugda nga motabang sa mga tawo nga naapektahan sa climate change, susama sa mga biktima sa bagyong Yolanda. Tinguha sa WWF nga pinaagi sa Earth Hour, makatigum kini og igong pundo aron makapahimo ug makapanghatag og mga sakayan sa mangingisda dinhi sa Pilipinas nga naapektahan ni Yolanda.

 Ang Cebu, bisan pa og nakasinati usab sa pagkuso-kuso ni Yolanda, mitabang gyud gihapon sa ubang mga biktima sa bagyo. Giawhag kita nga makighiusa sa kalibutan sa pagpakiggubat batok climate change ug sa pagtabang na pud sa mga biktima sa bagyo.