Tamdanan sa kasingkasing

Tungod sa tumang panlimbasog sa kinabuhi, sagad nataligam-an na lang ang kahimsog sa panglawas nga maoy naghatag og kusog sa paglahutay busa mapuslanon nga ato kini hatagan og prayoridad sa inadlaw natong gimbuhaton. Ayaw paabota nga ang sakit na ang modiktar sa lawas mo, aron ikaw mao nay hasulon niini nga mag-antos.  Ang atake sa kasingkasing maoy nag-unang sakit karon. Malikayan unta ang hinanaling kamatayon kun may kahibalo pa, unsaon pagsanta o pagpugong nga dili kini mograbe. Mas maayo samtang dili pa ulahi, iprayoridad nga himoon natong tulomanon o tamdanan kining mga mosunod: (1) Ang pagkaon ug mga pulang prutas- may nutreyens o kemikals kini nga makapahimsog sa kasingkasing. Sama sa pulang kamatis, pulang mansanas, pulang pakwan, pulang ubas o grapes ug pulang strawberries.

(2) Ang pagkaon og mga berdeng utanon, aduna gihapon kini mga benepisyo nga molimpyo sa pinong kaugatan sa kasingkasing. Gawas ani, maayo sad ang tambok nga isda, ug mga oatmeal aron pagbalanse sa kolesterol.

(3) Ang ehersisyong dasig sa paglakaw samtang permi nga maghingosog lawom unya mobuga’g ginhawa. Sud sa 30 mins, ka lima kada semana.

(4) Ang igo nga pahuway, mopabaskog sa lawas. Kinahanglan matulog og 7 hangtud 8 ka oras. Likayan ang permi pamuwaw, kay makahayblad kana.

(5) Ang pakigsandurot o pakighigala – kanila makighinabi aron dili ma-stress.

(6) Ang paglingaw o pagkurikuri – kanang mga makalipay kanato.

(7) Ang paglikay sa panigarilyo – mopahayahay sa kasingkasing ug baga.

(8) Ang pagbasa’g makapatawa ug makapadasig nga basahon kini makaayo.

(9) Ang paghimo’g kalihokan o pagsikaysikay aron di maaburido ang isip nga mosangpot sa kaguol nga maapektahan usab ang bation sa kasingkasing.

(10) Ang pagbisyo’g inom sama sa droga o makahubog nga ilimnon, makadaut kana sa imong panglawas.

(11) Ang kaabtik sa pagbaton og kasayuran sa mga panghitabo, makaalerto kana sa mga positibong panghunahuna, nga mopakalma sa mahimong bation.

(12) Ang pagtagad dayon kun adunay sintomas nga dili mo sagad bation.