DPWH natulog gihapon!!!

Wala g’yud ko masayop, gikaskas g’yud ang nindot ug sinaw pa kaayo nga  Gorordo Avenue atubangan sa Colegio dela Inmaculada Concepcion aron aspaltohon pag-usab.

Duna ko’y hulagway nga magpakita nga ang karsada nindot pa kaayo apan gipakaskas g’yud sa DPWH. Giaspalto man tuod dayon nila apan daw walay kalainan kay nindot man lagi kadtong mao nga karsada.

Mora lagi og buta kining mga opisyal sa DPWH kay wala makakita nga ang bati nga karsada atubangan sa University of the Philippines (UP)-Cebu wala hinoon ipauna pagpatrabaho.

Ang karsada nga sinaw pa kaayo mao hinoon ang ila nga giuna sa pagkaskas ug giaspalto pag-usab. Ngano man ni? Aron nga gamay ra ang aspalto nga magamit ug makaganansya’g daku ang kontraktor?

Hangtod karon, hapit na mo-duha ka semana nga ang kontraktor nga gitugyanan pag-aspalto sa Veteran’s Drive atubangan sa Marco Polo Hotel wala na g’yud maglihok, wala humana.

Daku kaayo ang billboard nga gipahimutang “WARNING, UNEVEN ROAD AHEAD.” Nagpatuga-tuga man tawon kining mao nga kontraktor pagsulod og kontrata nga dili man makatrabaho og tarong.

Unya, kinsa ba ang supervisor o inspector sa DPWH nga nagtan-aw aning maong project? Basin matulog na lang ‘sab kini’ng mao nga kawani.

Duol sa barangay hall sa Busay gikaskas ang aspalto og kapin sa usa ka pulgada.

Ambot og giuli ba kaha nila ang tukma nga gibag-on. Sa daplin nga bahin makita kaayo nga nipis ra ang aspalto nga gibutang kay wala kini makatupong sa karaang aspalto nga ilang gikaskas. Husto ba kini o panikas?

Makapikal kaayo ang gihimo sa DPWH nga ang mga maayo nga karsada maoy giuna sa pagkaskas aron aspaltohon pag-usab apan ang mga gubaon, sama sa V. Rama Avenue gipasagdan lang.

Si Engr. Lito Catubig sa DPWH-Cebu City district office, miingon nga maghuwat lang ang mga motorista kay apil ang V. Rama nga aspaltohon, nganong wala man kini unaha?

* * *

Dunay pitaka nga gipanag-iya ni Sandto Balaod nga taga Borbon, gikuot samtang nagsakay siya’g PUJ gikan sa SM paingon sa North Bus Terminal.

Kun kinsa ang nakakita, palihog iuli. Ihatud lang diri sa opisina kay daghan kadto og sulod nga mga ID sama sa SSS, PhilHealth, ATM, lisensya sa armas ug uban pa.

Pastilan, kanus-a kaha mapuo kining mga mangunguot. Mao bitaw nga ako, pabor kaayo niadtong pagtumaw sa mga vigilantes kay tan-aw nako dili mapitol sa ordinaryo nga balaod ang mga gahi’g ulo. Nasayod ko nga daghan ang mosaway nako niining mao nga baruganan, apan nabiktima na man gud ko sa mga kawatan nga misaka sa akong balay.