Pulis exempted ba sa overnight parking?

Adunay concerned citizen (ngan gipugngan) miduol ning tagsulat ug misumbong, nga ang ilang dalan sa T. Padilla ning dakbayan, gamay. Sa masig ka kilid may signage nga: ‘No Parking’. Apan giparkingan lang gihapon sa mga gahi’g ulo. Ultimong sudlonong dalan nga anaa duol sa Julie’s Bakeshop, diin ang espasiyo daginoton, giparkingan sab sa mga tawong walay laing gihunahuna kun dili ila lamang gusto sa walay pagpakabana kun kining ilang gihimo di ba makahasol sa ubang sakyanan ug mga tawo nga mangagi dinhi.

Nahadlok ang concerned citizen nga simbako may sunog sa maong dapit, maglisod na hinuon ang morespondeng bombero sa pagtabang-palong sa kalayo kay dili na man makalusot dayon.  Usab, kun dunay ubang matang sa emerhensiya sama pananglit sa masakiton nga kinahanglan dad-on gilayon sa ospital aron maluwas, malangay hinuon kay babagan man sa nag-parking nga sakyanang walay puangod ang mokuhang ambulansiya.

Lisod ang nahisgotang lugar sanglit gamay ang dalan ug daghan ang namuyo. Unya, parkingan pa gyod og overnight sa mga lumolupyo, kinsa dunay mga kotse. Naa kunoy usa dinhi nga puwerting tibaya! Tag-iya kini’g duha ka sakyanan, pero walay kaugalingong grahean. Mao nga ang hagip-ot nga karsada maoy gihimong parkingan. Sugid pa sa concerned citizen, untouchable kuno ang maong tawo. Ngano? Kay kini usa kuno ka pulis. Usa ka iso’g kaayong pulis.

Mao ba? Di ba ang pulis mao man ang manakop sa mga tawong badlungon? Na’an, karon ... kinsa man ang modakop ining pulisa nga nagpabadlong? Nga siya, mismo, mao man ang mananakop?

Chief Supt. Danilo Constantino, maayo ning susihon, Sir, da! Panahon na, nga agbayan ta kining pulisa ug pahinumdoman nga kining iyang gibuhat dili maayo. Very harmful man ni sa mga mata ug kasingkasing sa publiko. Makabuling pa gyod sa gisul-ob niyang tuskig nga uniporme.

Kay kun dili ni siya mopatuo, Sir, makapangutana gyod ang katawhan: “Unsa man diay ning mga pulis? Exempted sa gidiling overnight parking? Sakita sa dalunggan, uy! Bitaw, Sir, nindot unta nga mabadlong ning pulisa, da!