Editorial - Kalinaw sa Mindanao

Napirmahan na ang Comprehensive Agreement on the Bangsamoro (CAB) human sa kapin 30 ka tuig nga rebelyon nga gilusad sa Moro Islamic Liberation Front (MILF). Gipaabot nga magbunga kini og maayo dili lang sa  kaigsuonang Muslim kondili sa tibuok Mindanao, lakip niini ang mga Kristiyanos ug mga Lumad.

Daghan ang nalipay ilabi na sa mga taga Mindanao nga maoy labing naapektahan sa kagubot, kagubot nga maoy nakaingon nga nabiyaan ang kinalapdang bahin sa maong isla kun itandi sa ubang bahin sa nasud.

Panahon na usab siguro sa ubang mga armadong pundok nga nagtinguhang mabuwag gihapon sa Pilipinas ang Mindanao sama sa Moro National Liberation Front (MNLF) nga hatagan og kahigayonan ang kalinaw sa Mindanao.

Dihang sila (MNLF) ang gipadala sa pagdumala sa Autonomous Region in Muslim Mindanao nakita ang deperensya tungod kay lapad gihapong bahin sa Mindanao ang wala makapahimulos sa bunga niini.  Tungod kay wa man maapil niini ang dako usab kaniadto nga grupong MILF mao nga wala gihapon makab-ot ang unta gitinguha sa ARMM. Wa maapil ang tanan kay napokus ang konsentrasyon sa mga MNLF communities ug wa ang sa sektor sa MILF.

Kini maoy hinungdan nga nagpabilin ang gubat ug gitawag ni Presidente Benigno Aquino III ang ARMM nga ‘failed experiment.’

Ang Bangsamoro taas pa og latason kay moagi pa kini sa Kongreso diin gipaabot nga dunay mga kritiko nga mobabag niini tungod sa nagkadaiyang rason husto man o dili. Human sa Kongreso, usa ka plebesito ang himuon sa mga dapit nga gitinguhang masakop sa Bangsamoro entity, niining paagiha makita kung asa gyud nga mga dapit ang gustong magpasakop pinasubay sa kultura , tradisyon  ug bisan na relihiyon.

Hunahunaon unta sa mga magbabalaod ang kaayohan alang sa tanan ug dili ang sa pipila lamang.