PMA batok UP

Ang Philippine Military Academy gitukod sa gobiyerno aron mag-umol og mga disiplinado ug mga ikapasigarbo nga mga opisyal sa militar. Mao kini ang usa sa mga hinungdan kun nganong ang usa sa ilang mga kadete gitangtang ug wala tugoti nga makagradwar tungod sa pagkalangay og duha ka minutos sa ilang klase ug sa pagpamakak sa iyang rason sa pagkalangay pagtambong sa ilang klase.

Apan subo lang palandungon ang Philippine Military Academy tungod kay ang disiplina nga ilang gipatuman sa ilang tunghaan dili diay kaseguroan nga honorable gihapon sila sa ilang paggawas sa akademiya. Kini tungod kay daghan sa ilang mga graduate nga nahimong heneral sa militar ug kapolisan wala lang mahimong bakakon, kurakot pa.

Hinuon ang akademiya gihapon ang nanguna sa mga institution nga tigpanalipod sa nasud ug tiggukod sa mga kaaway sa estado ug gobiyerno.

Ang University of the Philippines gitukod usab sa gobiyerno aron umulon ang mga mamahimong pangulo sa nasud ug aron manguna sa akademiya sa edukasyon. Produkto sa University of the Philippines ang mga mahait ug mga lantip og salabotan sa nasud. Pero subo usab nga palandungon kay ang uban kanila nahimong kaaway sa nasud ug sa gobyerno niini.

Sa milabay nga Sabado, nadakpan sa mga polis ug militar sa lalawigan sa Sugbo ang duha ka tag-as nga opisyal sa Communist Party of the Philippines-New People’s Army ang magtiayong Benito ug Wilma Austria Tiamzon.

Si Benito mao ang Chairman sa CPP-NPA samtang si Wilma mao ang Secretary-General. Kining duha pulos mga gradwado sa kolehiyo sa University of the Philippines. Ang ilang founder ug Chairman Emiritus sa ilang partido nga si Jose Ma. Sison gradwado ug magtutudlo usab sa University of the Philippines sa wala pa kini magtago-tago.

Nganong naingon man ani ang nahitabo? Nasobrahan ba sa kautokan ug ka lantip sa ilang mga huna-huna ang mga produkto sa University of the Philippines o gitudloan lang gyod sila sa pagrebelde?

Busa ang atong nakita karon mao ang duha ka tunghaan nga nagmugna og managkaaway. Ang PMA naghimo og produkto nga maoy molutos sa mga kaaway sa nasud ug gobiyerno nga mga produkto sa UP.