EDITORIAL - Kahadlok nga mapilde

Ang dakong sunog nga miugdaw og dul-an sa usa ka libo ka balay sa Barangay Lorega-San Miguel sa miaging semana mahulagway nga maoy resulta sa pag-abuso sa pipila ka molupyo ug sa pagpasagad lang sa mga opisyal.

Kun wala pa moabuso ang pipila ka molupyo ug kun gituman pa sa mga opisyal sa barangay ang ilang katungdanan, ang sunog nga miulbo didto sa Sitio Kamansi, dapit sa karaang menteryo, dali ra unta nga mapawong sa kabomberohan.

Unsaon, gipasagdan ra sa mga opisyal sa barangay ang mga mapahimuslanon sa higayon nga ang karsada likud sa karaang ihawan nga gigamit na nga sports complex gipangtukoran og tindahan ug panimalay. Ang karsada modugtong unta sa laing karsada nga gitawag og San Miguel.

Mga tawo na lang maoy makaagi sa kanhi lapad nga karsada. Mga opisyal sa barangay ingon sa wala lang makakita sa mao nga talan-awon ug wala makalantaw sa sangpotan kun mahitabo ang sunog.

  Ang kahadlok nga mapilde sa umaabot nga eleksyon sa barangay maoy nag-una nga rason kun ngano nga ang mga opisyal magpanuko pagpatuman sa balaod nga maapektahan ang ilang mga botante.

Mga opisyal sa kabarangayan angay g’yud unta nga dili mahadlok nga mopatuman sa balaod kun ang ilang pagahimoon gitumong alang sa kaayohan sa kadaghanan.

Unsaon pagsulod sa trak sa bombero nga ang karsada aduna may gipangtukod nga tindahan? Kining mao nga talan-awon dili ra diha sa luyo sa karaang ihawan, makita usab kini sa gamay’ng karsada atubangan sa barangay hall sa Lorega apan ingon sa wala lang makakita ang mga opisyal.