EDITORYAL - Honor code

Sakit kaayo ang gidangatan ni kanhi Philippine Military Academy cadet First Class Jeff Aldrin Cudia kinsa gitaktak sa maong institusyon gumikan sa pagpamakak kun nganong na-late kini sa iyang klase.

Matud pa nga nalapas ni Cudia ang Honor Code sa PMA, ang labing balaang patakaran nga gisilsil sa maong institusyon ngadto sa alimpatakan sa mga kadete niini. Ang kadete  di mangawat , di mamakak ug di mokonsintir sa mga mihimo niini.

Daghan ang miingon nga bug-at ra kaayo ang gipahamtang nga silot sa kadagkoan sa PMA apan gibarogan gyud nila ang desisyon sa Honor Committee nga gilangkoban usab sa mga kadete.

Apan ang pangutana kinsay nagtug-an kanila og tinuod? Ang nihimo sa desisyon o ang pangangkon sa pamilya ni Cudia nga dunay usa sa sakop sa honor committee ang supak sa pagpataktak kang Cudia.

Karon ang pangutana asa namay honor ani? Kun  ang mismong kadagkoan sa PMA ang namakak? Apan mahimo sab balihon ang pangutana, unsa man diay motibo sa PMA aron iduot si Cudia nga kandidato man unta siya nga salutatorian sa Siklab Diwa Class of 2014?   

Husto ang gibuhat sa PMA pag-dismiss kang Cudia aron ipreserbar kun unsa may gisilsil nga pagtulun-an diha sa maong institusyon.

Apan nakurat ang mga alumni sa PMA tungod sa gihimo ni Cudia nga pagsungag sa desisyon.Usa kanila si Senador Panfilo Lacson, PMA Class 1971.

Matud niya karon pa siya nakadungog og kadete nga gihusay ug nahukmang sad-an sa honor committee sa PMA nga misungag sa desisyon.

Dunay miingon nga mahimo ra unta siyang mobalik sa sunod nga tuig aron ipadayon ang iyang pagtungha apan moagi siya og proseso.

Sa pagkakaron, bugtong paglaom na lang ni Cudia mao ang hukmanan, apan bisan pabor pa kaniya ang desisyon dili gihapon mabalik ang naandang pagtan-aw kaniya sa mga kaubang kadete.