Ginegosyo ang pagpakigbatok sa drugas

Human mahukmi sa hukmanan ang mga kaso sa ginadiling drugas nga nasang-at sukad pa kaniadtong tuig 2010 hangtod ning buwana, gisunog sa hukmanan ug sa mga taga Philippine Drug Enforcement Agency 7 (PDEA-7) ang minilyon nga kantidad sa ginadiling drugas.

Pero samtang ang mga ebidensiya gipangsunog, ang mga nakuhaan niini naabsuwelto o nakalingkawas sa kaso nga ilang giatubang.

Sigun sa pahayag sa huwes nga naghupot sa mga kaso sa ginadiling drugas, mokabat ngadto sa 130 ka  kaso ang iyang nabasura tungod kay wala masubay sa balaud ang pagkakuha sa mga ebidensiya niini ingon man ang pagputol sa kadina sa kustodiya sa paghupot sa ebidensiya.

Dakong kadaugan sa mga nagpayuhot sa ginadiling drugas ang pagka basura sa 130 ka kaso sa ginadiling drugas ug dako usab kining kapakyasan sa gobyerno sa iyang kampanya batok sa ginadiling drugas.

Nganong wala masubay sa balaud ang pagkuha sa ebidensiya ug nganong naputol ang kadina sa kustodiya sa ebidensiya? Kini ang angayang tutukan sa pagtan-aw sa mga hukmanan kana tungod kay anaa niining lungaga nakasulod ang mga negosyanting polis ug ubang law enforcement officers. Dinhi ning lungaga mibaligya sa kasong ilang gihuptan ang mga polis ug kay nahalin na ang kaso ang uban kanila dili na motunga sa panahon nga ipatawag sila sa bista sa kaso. Kun adunay dili na motunga, aduna usay motunga kanila apan ang nakaparat kay dili na upod kamao manubag kay ang saktong tubag nahalin na.

Bisan pa og wala masubay sa balaud ang pagkasakmit sa mga ebidensiya ako nagtuo nga ang kaso dili gayod mabasura ug lagmit ang nakuhaan sa ebidensiya makonbikto pa kana kun maayo lang ang kapolisan manubag sa mga pangutana sa hukmanan. Kun gusto gyod sa polis nga konbiktohon ang akusado makamao siyang manubag ug morason ug ang ebidensiyang nakuha nga wala masubay sa balaud iya na kining mapasubay.

Ang kampanya batok sa ginadiling drugas dili gayod magmalampuson kun ubanan kini og negosyo sa mga gitahasan sa pagpakigbatok niini.