EDITORYAL - Ang ubang mag-uuma walay kalooy

Aduna’y mga tawo nga dili malooy sa mga mananap apil na gani sa mga binuhi’ng kabaw nga napahimuslan sa mga mag-uuma aron mapasayon ang pagtikad nila sa ilang mga baol.

Napahimuslan sa mga mag-uuma ang kabaw nga buntag pa’ng sayo sangonan na nila og yugo aron paguyoron sa puthaw nga daro ug dali ra ang pag-ugmad nila sa yuta.

Duna’y mga mag-uuma nga dili gani mohatag og tukma nga pagkaon sa ilang binuhi’ng kabaw mao nga daghang kabaw sa kabukiran nga niwang ang panglawas.

Kun moabot na ang higayon nga tiguwang na ang kabaw, sagad sa mga mag-uuma dili malooy nga mobaligya sa ilang hayop aron ipaihaw ug ila gihapon nga makwartahan.

Ang uban’g mag-uuma ibaligya ra g’yud ang ilang kabaw bisan og takus pa unta kaayo kini nga moserbisyo.

Aron may rason sila nga ibaligya ang batan-on pa nga hayop, ilang bunalan ang kiting sa kabaw aron kini magtakihod na nga maglakaw.

Base sa rekord, nagkaminus g’yud ang gidaghanon sa mga binuhing kabaw dinhi sa nasud gikan sa 2.7 milyones niadtong 2007 ngadto na lang sa 2.3 milyones pagka sunod tuig.

Maayo na lang nga misaka pagbalik ang gidaghanon sa mga kabaw ngadto na sa 2.8 milyones kaniadtong 2013. Niadtong 1962, aduna pa’y 3.5 milyones ka kabaw ang nasud.

Angay g’yud nga lig-onon ang balaod nga magdili pagpataka og ihaw sa mga kabaw aron dili moabot ang higayon nga sa hulagway na lang nato makita ang mao nga hayop.