EDITORYAL - Armas o serbisyo?

Dose ka mga sundalo ug polis ang nakalas sa buwag apan may koordinasyon nga pagpangatake sa mga rebeldeng New People’s Army sa Matanao, Davao del Sur.  Kung tutukan og maayo, way kausaban ang taktika nga gigamit sa NPA sa ilang mga  pagpangatake kaniadto. Pagpanghudlat ug ekstorsyon.

Milampos ba ang gobiyerno batok insurhensiya? Siguro dunay mga lugar nga wala nay mga rebelde apan duna pay daghan nga nagpadayon ang pagkuyanap sa mga rebelde.

Ang militar ug kapolisan nagmalampuson na man sa ilang kampanya batok sa insurhensya sa naghinapos nga bahin sa dekada 90 apan sa pipila lang ka mga lugar.

Kini dihang gihingusgan ang Police Community Relations ug Civil Military Operations sa PNP ug AFP nga gisuportahan gyud sa mga local government units.

Inay armas ug pwersa, civic missions sama sa free medical, dental missions, livelihood programs ug mga lectures maoy napamatud-ang epektibong armas batok insurhensiya ug aron mapaduol ang gobiyerno sa mga tawo.

Ang kakuwang sa oportunidad ug mga batakang panginahanglan sama sa mga tarong nga karsada, elektrisidad, barangay health clinics, mga eskuylahan daling ma-exploit sa mga rebelde aron maka-recruit og mga miyembro. Ang Probinsya sa Cebu ug Bohol infested kaniadto sa mga NPA apan pinaagi sa kooperasyon sa LGUs , PNP ug AFP napuo ang insurhensiya sa ilang mga lugar.

Sukad nga gidugangan ang mga dalan sa kabukiran nga konektado sa mga kalungsoran ug siyudad nahatagan og oportunidad ang tanan, ug labaw sa tanan migamay usab ang kalibotan sa mga rebelde maong nanglayas sila sa Cebu ug Bohol.