Unang adlaw sa eskwela

Mga tema nga nalambigit niini: Bag-ong sinugdanan, kausaban, dili andam, kasagmuyo

Adunay mga higayon nga diha sa atong mga damgo kita ang makakita sa atong kaugalingon nga mibalik sa atong pagkabata niadtong bata pa kita nga una kitang mitaak sa natad sa atong mga tunghaan. Sa maong esena atong aninawon ang atong mga gibati o emosyon.

Positibo man o negatibo. Ang positibong emosyon, buot mopahigmata kanato nga sa atong waking world kita adunay kaikag nga mosugod og bag-ong hugna nga hinatud sa atong pagkamamugnaon.

Apan sa laing bahin kun ang nagpasulabing emosyon negatibo, kini tungod kay adunay mga kasinatian sa pagkabata nga naghatag og trauma alang kanato nga padayon natong gibitbit hangtud na sa atong paghingkod. Atong hinumdoman nga ang atong pagkabata kaniadto ang mahimong makatagna kun maunsa kita karon.