Simulation of births kon pag-tamper sa birth records sa bata

Dili tanang magtiayon ang nahatagan og grasya nga makabaton og anak. Busa ang uban kanila makahuna-huna sa pagsagop og bata. Ang uban mosagop pinaagi sa legal process apan adunay uban nga ipaagi sa short cut kay mas dali ug minus gasto. Apan unsa bay risgo kun imo na lang angkunon sa birth certificate sa bata nga ikaw ang ginikanan inay iagi pa sa korte? Kana nga pangutana ang atong tubagon karon sa atong column.

Atty Divine maayong adlaw,

Pasayloa intawon ko atty, maghasol na sad ko kanimo ug pangayo sa imong opinion. Minyo ko pero wala me anak sa ako asawa, siya 46 yrs old na ug ako 45 yrs old na pud. Sa wala namo damha adunay gitanyag kanamo nga new born child, ug ang inahan sa bata kay usa ka GRO.Sa iyang pagpanganak sa hospital iya gitanyag kanamo nga ipasagop niya kanamo ang iyang anak ug amoa pangalan ang iya gusto nga ibutang sa live birth para magdako kuno ang bata nga kami ang nakabutang nga pangalan isip ginikanan sa bata. Iya mi gipabuhat ug kasulatan tali namo ug sa inahan sa bata, nga dili na siya manghilabot sa bata hangtod   sa hangtud.Ang gusto lang niya nga makasiguro siya nga naa sa maayong kamot ang bata, kay sa magdako nga wala’y klaro mapadulngan. Sa tinuod atty anaa na kanamo karon ang bata mga 1 week na, ug ang inahan sa bata sa among nasayran mipauli sa Mindanao. Karon atty. sakto ba ni? Kay dili man ni matawag og legal adoption?Ug amo sad ni i-process ang legal adoption modako ang bata nga makahibaw siya nga dili kami ang matuod niya nga ginikanan, kay motatak man sa live birth inig lukat na unya niya. Unya dako sad og magasto. Mahimo ba atty nga dili na lang mi mo-process og legal adoption? Kay amoa na man ang pangalan nakasulat sa live birth isip ginikanan? Daghan kaayong salamat atty Divine. — Rolly P

Dear Rolly P,

Kanang inyong gibuhat mao kanay gitawag og simulation of births kon pagtamper sa record sa Civil Registry aron mogawas sa birth records sa bata nga kamo ang matuod nga ginikanan bisan kun dili kamo ang biological parents. Usa kana ka kalapasan sa Article 347 sa Revised Penal Code busa ang mga tawong mapamatud-an niini hayan mapahamtangan og silot. Mao kanay sagad buhaton sa mga magtiayon nga way anak, mas sayon ug minus gasto. Apan wa ta masayod nga sa umaabot nga adlaw magkaproblema na unya mo ilabi na kun ang inahan sa bata di na motuman sa sabot ug gusto na niyang bawion ang bata kay naka-realized siya nga sayop ang iyang gibuhat ug wa gyud unya moy mahimo ug wa gyud moy katungod nga mopugong kon kuhaon na sa matuod nga inahan ang bata. Busa alang sa inyong protection mas maayo nga ipaagi ninyo sa legal process ug himuong legal ang pagsagop sa bata aron ang inahan niini di na gyud mamahimong makabawi sa bata ug ang bata legal sab unya nga maka-inherit kaninyo sa bisan unsang butang nga inyong ibilin kaniya. Kanang inyong gasto sa pagsagop sa bata, gamay ra na kon itandi sa kahasol nga inyo unyang masugatan kun di ninyo ipahimutang sa legal nga paagi ang tanan. Gawas pa kanang bata nga inyong gisagop ubos sa balaod makonsiderar na kana nga inyong matuod nga anak nga mao unyay moatiman kaninyo kun kamo mamahimo na unyang mga Senior Citizen. Hinaut nga nahatagan nako og katin-awan ang inyong mga pangutana. Daghang Salamat ug God Bless. — Atty. Divine

Kun ikaw adunay pangutana may kalabutan sa problemang legal ipadala lang sa Legal Corner sa Banat News or email sa [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo.