Kisaw sa LTO-7

Aktibo pa ba ang Land Transportation Office (LTO-7) sa pagpatuman sa balaod trapiko?

Kun wala kamo makabantay, obserbahi ang dagan sa trapiko paingon sa south (kay sa south ra man pod ko pirme mag-drive), nagkadaghan na usab ang mga PUJ ug de pasaheroang bus ug minibus nga abusado kaayo sa ilang pagpadagan sa highway.

Sama pananglit niadtong miaging Domingo, samtang nag-drive ko sa akong awto paingon sa bag-ong inablihan nga department store sa Basak sakay akong pamilya, gisugat ko og minibus nga puwerteng kusoga nga nagpadagan nga nag-counterflow sa akong agianan.

Makadaghan na kini buhata sa mga minibus ug dagkong bus. Pero hain man ang LTO-7 nga maoy tigpatuman sa lagda sa trapiko sa mga national highway?

Tingale, disoriented ang LTO-7 karon tungod kay ang acting regional director nga si Arnel Tancinco nag-atubang og daghang kaso.

Kun nahinumdom kamo, si Tancinco gipasakaan og kasong administratiba sa 13 ka mga empleyado tungod sa pabor-pabor nga pag-hire og empleyado sa mga bakanteng posisyon sa LTO-7.

Sumala pa sa mga reklamante nga gimaniobra ang pag-post sa “vacancies” sa LTO-7 nga ang mga suod lamang ni Tancinco ug sa ubang tag-as nga opisyal sa rehiyonal nga buhatan sa ahensiya hinungdan nga kadtong uban nga interesado wala makapreparar sa kinahanglanong papeles aron maka-aplay.

Pero gamay-gamay ra kining reklamoha. Adunay empleyado nga misang-at og reklamo tungod sa matud pa pagpugos ni Tancinco kaniya nga makahatag og P5,000 kada adlaw gikan sa mga kliyente sa LTO-7.

Ang gi-notaryohan nga complaint-affidavit ni Carmenia Caballes pinetsahan og Disyembre 4, 2013, nagkanayon nga gikan sa P5,000 gisaka kini sa P7,000 aron makahatag sa lain pang duha ka opisyal sa LTO-7.

Sa dihang napakyas na si Caballes paghatag, gibalhin siya sa iyang naandan nga plantilla item sa Region 8 sa Tacloban City.

Apan si Tancinco sa iyang mga tubag sa dihang naabot sa media kining reklamoha, nagkanayon nga kinsa kadtong nangreklamo batok kaniya mao kadtong mga babag sa iyang gipatuman nga reporma sa LTO-7.

Gihimakak niya nga midawat siya gikan kang Caballes.

Apan taym pa ra gud, unsa man nga reporma ang giingon ni Tancinco?

Sa mga nangaging mga disgrasya sa kadalanan nga mikalas gyud og mga kinabuhi, unsa man nga reporma ang iyang gipasiatab diha sa LTO-7?

Wala gihapon mapuo kining mga adik nga mga drayber nga kun makamaniho sa karsada mura’g nag-drive og eroplano, paluparon ang mga bus ug PUJ.

Kun dili na kaya ni Tancinco ang pagdumala sa LTO-7 mo-reflect kini sa kisaw sa mga kaubanan, ilabi na kadtong anaa sa ubos. Karon nga kisaw kaayo ang mga empleyado batok kaniya, maglibog kita kinsa kaha kanila ang adunay binuang.