EDITORYAL - Ayaw kahadlok sa hulga

Ang Republic Act 9003, kon Ecological Solid Waste Management Act giaprobahan ni kanhi Presidente Gloria Macapagal-Arroyo kaniadtong Enero 26, 2001.

Kun hingpit nga ipatuman ang balaod nga maglakip sa pagpahamtang og silot sa mga opisyal sa kagamhanan nga mag-ukon-ukon pag-implementar, moresulta nga limpyo ang atong dakbayan.

Abi ninyo og ngano? Kun ikiha ang mga opisyal nga dili mopatuman sa balaod diha sa tagsa-tagsa nila ka teritoryo, mapugos sila sa pag-implementar kay aron dili sila magkabulingit sa kaso nga ilang atubangon.

Gilatid sa balaod nga ilain og sulod ang mga basura nga malata ug kadtong dili madugta. Apan 13 ka tuig na ang nakalabay, ang balaod wala gayud hingpit nga gipatuman.

Sagad sa mga opisyal mahadlok moestrikto pagpatuman sa balaod kay kun pangdakpon nila ang ilang mga molupyo sigurado nga pilde sila sa sunod eleksyon.

Gimando ni Mayor Michael Rama nga sugod Marso 1, dili na kolektahon ang mga basura nga wala mabahig-bahig kadtong malata ug ang dili malata.

Kini aron nga ang mga tawo mismo magmatngon nga diha pa lang sa ilang kabalayan, isulod nila sa buwag nga sudlanan ang malata ug ang dili malata.

Apan gikolekta man gihapon sa mga garbage collectors ang wala ma-segregate nga basura. Resulta, ang drayber sa 143 ka garbage trucks nadakpan sa taga City Hall sa unang adlaw sa estrikto nga pagpatuman.

Nakabantay tingali nga estrikto na ang pagpanakop, mikunhod ang nadakpan kagahapon ngadto na lang sa kapin sa 20.

 Apan adunay drayber og trak sa basura nga nanghulga kay siya gidakop. Husto ba nga masuko?