Sige lang...

Human na ang Archdiocesan Process ni Arsobispo Teofilo Bastida Camomot. HInaut nga mabayaw gyud siya sa kadungganan sa mga altar kun kanus-a ni mahitabo, wala kita masayud. Apan usa sa mga hiyas ni Monsenyor Lolong mao man nga niadtong buhi pa siya, iyang gipakita ang iyang dakong pagsalig sa Diosnong Pag-amuma nga tungod niini andam siyang mohatag sa bisan unsa nga iyang nahuptan apil na niini ang mga materyal nga mga butang. Usa ka adlaw niana samtang miadto sila sa Dakbayan sa Sugbo gikan sa Carcar, giingnan siya sa iyang drayber nga diyotay na lang ang gasolina ug dili na sila makaabot sa siyudad. Ang Obispo igo lang miingon: Sige lang, kun asa kita kutob diha ra gyud kita. Ug tuod man nihunong ang maong sakyanan sa gasolinahan kang kansang tag-iya higala sa maong Obispo nga mitubil og gasolina dungan ang paghatag og salapi niini. Dili ba usa man kini ka maanindot nga kasinatian sa Diosnong Pag-amuma.Kini usab ang hagit sa atong ebanghelyo karon. Kun ang Dios makaako sa paghatag og pagtagad sa mga butang nga maisip natong yano kita pa kahang mga tawo nga gihigugma sa Dios pag-ayo dili ba? Mahimong pasagdan kita ug biyaan sa tanan apan ang Dios padayong magpakabana alang kanato. Iyang ihatag ang maayo ug haom alang kanato.