Pagpanibya ug paghiusa

Dumaguete City, Negros Oriental — Nakig-uban ko sa kadagkoan sa Kapisanan ng mga Brodkaster ng Pilipinas (KBP) Negros Oriental Chapter dinhi aron pagtuki sa labing uwahing kalamboan sa industriya sa pagpanibya. Gidapit ko ni KBP Director Ely Dejaresco sa DYEM FMBai Radio sa ngan sa tanang kadagkoan nga gipangulohan ni KBP Chairman Michael Palma sa Yes FM.

Usa sa labing nakahasol nila mao ang pipila ka blocktimers nga nidagsa dinhi sa piniliay sa Mayo sa niaging tuig, gipasanginlan nga naglinabayay og lapok. May hudlat nga magkinihaay ang nagkasungi nga blocktimers ug mga politiko. May blocktimers sang gitumbok nga nagduma og mga programa sa radyo bisan way accreditation sa KBP.

*  * *

Gipasaligan nako sila nga way kalainan ang ilang problema sa Sugbo ug ubang bahin sa nasud: Blocktimers nga nagtuo nga tungod kay nagbayad sila sa oras sa kahanginan makapatuyang na sa ilang gibati, nga di sila madutlan sa mga lagda sa responsable nga pagpanibya nga nagduma sa mga kawani sa mga sibyaanan.

Nalutsan nila bisan ang batakang panginahanglan sa pagpanibya--ang lisensiya sa KBP--nga makuha lang sa pagpasar sa accreditation examination ug sa pagkuha og pasar nga grado gikan sa tagduma sa estasyon diin sila nagsibya--pinaagi sa pagpahimus sa buslot sa lagda, nga kinahanglan lang silang kuyogan og accredited nga magsisibya, bisan kun ang papel mao rang pagyangu-yango nila.

* * *

Bisan sa bisyo sa pipila ka sibyaanan sa pagbiya sa KBP kun maapiki na sila sa mga lagda, gidasig nako silang Palma, Dejaresco ug kaubanan sa pagpasabot ug pagpalambo sa self regulation. Pinaagi lang sa pagbantay sa ilang kaugalingon nga epektibo nilang malikayan ang mas makadaot nga pagpanghilabot sa gobyerno ug mga politiko.

Usa sa mga hinungdan nga napugngan hangtod karon ang gikaintapan nga balaudnon sa right of reply, nga ang mga politiko makademanda og samang luna sa mga pamantalaan ug oras sa kahanginan pagtubag sa mga pasangil batok nila, mao ang kinatibuk-ang kalamposan sa KBP ug ubang kahugpongan pag-polis sa ilang kaugalingon.

* * *

Gisugyot sab nako nila nga mahimo silang mas epektibo sa pagtul-id sa badlungon nga mga magsisibya ug mga peryodista pinaagi sa pagpakigtambayayong sa ubang nagpakabana nga sektor sa katilingban, sama sa mga eskuylahan ug simbahan. Mao ni yawe sa talagsaong kalamposan sa Cebu Citizens Press Council (CCPC) sa paghiusa sa media sa Sugbo sa mga kawsa nga mas dako kay nila.

Tuguting akong pahalipayan ang bag-ong napili nga batan-on nga mga opisyal sa KBP Cebu Chapter: Chairman Jun P. Tagalog, Executive Vice Chairman Manny Galicia, Vice Chairman for AM Niño Padilla, Vice Chairman for FM Bong Roxas, Secretary Victor Toledo, Treasurer Julius Manahan, Auditor Demy Balminos, PRO Ayie Lanza ug Directors Marlon Baula, Fyds Palicte ug Jean Antiporta. [email protected].