Tambag sa mga late comer

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Panahon sa rush hour, halos tanang sakyanan nagdali. Hapit na lang paluparon ang ilang kotse. Ang nakaparat kay kun maglinya na ang daghang behikulo sa traffic light, mapugos gyud paghunong. Apan may bastos lang gihapong mga drayber. Bisa’g hibawo sila nga heavy traffic, magsige lang gihapo’g pabulhot sa ilang bosina.

Usa ka buntag duol sa eskina sa Banawa, naghuot na ang mga sakyanan. Misiyok akong dalunggan. Kay may karaang Pajero sa akong likod nga sige la’g pislit sa iyang bosina. Naglibog ko unsay akong buhaton aron pagtubag sa mensahe sa maong bosina. Di na man gud ko kairog. Kay bumper to bumper, baya! Aw, wa na lang ko maggunok. Pastilan, nagpunay man lang gihapo’g sirbato ang drayber. Mikagot akong bag-ang, uy! Kanaugon na ta nako, dihang.

Nanaug ang usa ka hamtong nang babaye, kinsa make-up kaayo ug nanuktok sa akong bentana. Gipaubos ko ang bildo aron makadungog ko sa iyang tuyo. Niya pa, ay: “Mahimo ba’g moabante ka?”

Gitubag ko siya: “Asa man ko abante? Nga bumper na man nang naa sa akong dulong? Unsa, imo kong ipabangga?” Haskang saltoha sa akong tingog. Mora’g teksas nga taas kaayo’g lupad. Wa kaalma ang babaye. Mikuyos. Ug nagdaling misakay’g balik sa Pajero’ng iyang gidrayban kay ‘GO’ na man ang signal ug miabante na’g sugod ang mga awto nga diha sa akong atubangan.

Sa side mirror, nakita ko ang babaye nga labihang kapaspas nga midala sa iyang Pajero didto sa Petron gasoline station. Unya, nagpatubil. Didto pa ko makasabot...nga hapit na diay mahutdi’g diessel iyang sakyanan. Usab, iyang mga pasahero pulos estudyante sa haysikol. Nakapanglingolingo ko dihang nasiplatan ko ang relo sa akong Sports Runner. Alas 7:30 na sa buntag. Samot, nga mibugnaw ang kainit sa akong ulo. Nahunahuna man gud nako nga ma-late na diay ang ighahatod niadtong babaye nga mga estudyante. Mao to nga sige la’g bosina ganina.

Tambag lang ngadto sa mga late comers. Kun kamo hadlok ma-late, biyahe’g sayo. Hatagi og igong time allowance ang inyong paggikan. Buwahan, didto sa mga nagkuros nga dalan, diin pirmeng mag-heavy traffic di na mo maka-disturbo sa uban pinaagi sa pagpunay’g pislit sa inyong sirbato. Timan-i. Nga kining inyong kalangay, dili ang nag-ali nga daghang sakyanan ang hinungdan. Kun dili kamo mga late comer ra usab ang tuburan ug sinugdanan.

Kanang eskina Banawa, kun maabtan na’g alas 7:00 sa buntag, maghuot na ang mag-abot nga sakyanan diha. Busa, late comers nga tig-agian dihang dapita, biyahe’g alas 6:00 sa buntag aron di na madelatar. Sa inyong kadanghag, ayaw kini’g ipasa ngadto sa uban. Alingugngog intawon kaayo nang inyong binastos nga sirbato, uy! Di lang makaguba’g dughan. Makabungka’g pa gyud og nindot nga relasyon ngadto sa atong isig ka ingon.