Mga gay sa Uganda

Nagdahum kita nga niining moderno natong henerasyon nahunong na ang pagbugalbugal sa pipila ka miyembro sa atong katilingban ngadto sa mga gay kon homosexual.

* * *

Dinhi sa ato gihatagan na og respeto ang mga homosexual kon mga bayot. Gani ubay-ubay na sa mga kaigsuonan tang homosexual ang nagkupot og mga importanteng katungdanan sa kagamhanan.

* * *

Apan didto sa Uganda nagkagrabe na hinuon ang pagtratar sa mga bayot. Ug gani di pa dugay ang presidente sa maong nasud mipirma sa usa ka balaudnon nga mihatag og labing kapait sa kinabuhi sa mga bayot. Ginganlan kini sa US media nga “the world’s toughest anti-gay law.”

* * *

Ubos sa maong balaudnon, nga karon usa na ka balaud, ang usa ka tawo nga makompirmar nga bayot bilangguon sa tibuok niyang kinabuhi. Gihimo nga usa ka dakong krimen ang pagbinayot ug gimandahan ang katawhan sa pagwala sa ilang respeto sa katungod sa mga gay.

* * *

Ning bag-o pa dihay usa ka mantalaan nga mipagawas og listahan sa 200 ka mga ngalan sa bayot nga gilangkuban og mga prominenteng Ugandan nga konpirmadong nga homosexual kon bayot. Naay mga pari ug iladong mga propesyonal.

* * *

Giingon sa lain natong tinubdan nga kun magpadayon kining pagpanggukod sa mga bayot didto sa Uganda hayan mobarug ug modepensa sa ilang katungod ang mga bayot ug sinuportahan sa mga maligdong nga miyembro sa komunidad sa Kampala, ang kapital sa Uganda.

* * *

SA LABING BAHIN ... Dinhi sa Pinas respetado na karon ang mga gay ug gani ang katilingban mihatag kanila og kahigayonan nga makaangkon og desente  nga kinabuhi ... Daghang salamat sa atong mga magbabasa diha sa mga kalungsuran sa South Cebu.