Kampeyon sa mga drayber
Nakaangkon og kampeyon sa Cebu City council ang mga drayber sa mga sakyanang pribado ug pamasahero nga gipugos pagtahan sa ilang lisensiya sa ilang pagsud sa pipila ka pribadong subdivisions ug mga kompaniya. Gipasar sa mga konsehal ang resolusyon nga nag-awhag sa dinalian nga paghunong sa nagkalapad ug nagtakud-takod nga pagpatuman ning ilegal nga lagda.
Gihatagan ko ni Konsehal Alvin Dizon og kopya sa resolusyon nga napasar atol sa ilang sesyon niadtong Miyerkules. Gitataw sa resolusyon nga angay’ng tahuron ang Republic Act No. 4136, nga nailhang "Land Transportation and Traffic Code" nga ang Land Transportation Office (LTO) ug ilang deputized agents ra ang may gahom pagsakmit sa mga lisensiya sa mga drayber nga madakpan tungod sa kalapasan sa mga lagda sa trapiko.
* * *
Nahasol ang mga konsehal sa mga taho nga ilang nadawat nga pipila ka subdivisions sa dakbayan (labing gireklamohan ang Ma. Luisa Estate Park, apan gihimo sab sa uban pang subdivisions ug mga kompaniya sa Metro Cebu) nanguha sa mga lisensiya sa mga drayber sa taxi, pribadong mga sakyanan ug mga motorsiklo nga mosud sa subdivision.
Nagkauyon ang mga konsehal nga ang driver's license nga giluwatan sa LTO di angayng isipon nga ordinaryong identification card (ID) kay permiso kini gikan sa gobyerno nga naghatag sa mga drayber sa katungod pagmaneho og sakyanan subay sa kadalanan ug nga kinahanglan nga dad-on sa tanang higayon samtang nagmaneho sa sakyanan.
* * *
Giawhag sa mga konsehal ang Housing and Land Use Regulatory Board (HLURB) sa (1) pagbadlong sa tanang homeowners associations (HOAs) sa subdivisions sud sa dakbayan nga naghimo sa ilegal nga pagkuha sa mga lisensiya sa mga drayber sa mga sakyanang pribado ug pamasahero nga moagi sa ilang guardhouse ug (2) pagtambag nga ubang ID sa gobyerno maoy kuhaon pagpatigbabaw sa katungod sa HOAs pag-ila sa tanang tawo nga mosud sa ilang subdivisions tungod ug alang sa ilang seguridad.
Gihatagan sab og kopya sa resolusyon sa city council ang Philippine Association of Detective and Protective Agency Operators (PADPAO) aron nga kagiyahan sab ang security agencies nga gikontrata sa pagbantay sa pribadong subdivisions ug mga kompaniya.
* * *
Nasobrahan rang kahigpit sa mga lagda sa seguridad sa Ma. Luisa Park Association (MLPA) nga bisan ang homeowner sud sa iyang sakyanan nga may MLPA sticker gipangayoan sa guwardiya og ID. Uwahi nang nakabantay ang guwardiya sa iyang sayop nga nabanghagan na siya ug napugos sa hilaw nga pagpangayo og pasaylo.
Laing homeowner sa MLPA, nga inilang politiko apan di abusado, napugos pagkanaog sa taxi nga iyang gisakyan gikan sa airport kay nagdumili ang drayber pagtahan sa iyang lisensiya sa guardhouse ug nagbaguod intawon sa iyang bagahe nga nagbaktas padung sa ilang bay.
* * *
- Latest
