China dili na mapitol

Lisud sa mga Cebuano nga mahimong artista nga  mainila sa nasud gawas lamang  kun  moadto ka sa Manila ug mahimong suod sa mga direktor sa pelikula. Kini tungod kay kun imong sud-ongon ang mga salida nga Cebuano nga makita sa lokal nga TV wa gyuy  tinuod nga "objective" lahi sa mga pelikula  nga  Tinagalog.

Ambot daghan man  untang mga writer og drama nga Cebuano, unya bahin sa artista, anaa  baya  gyud  untay mapunit  ug  mapili  dinhi, apan tan-awa  ang  mga  salida, wa gyuy  umento.

Ultimong Binisaya nga konbersasyon, inamawon ug  di tarungon  sa pag-estorya nga  mura’g  di  kaantigo  mobinisaya  ang mga entrante.

Sa laktud matapos  na lang  tingale ning  kalibotana  wa  gyuy maayong laki  nga  artista  gawas  sa  mga Tagalog,  ug  ang  ubang  probinsya sa nasud  igo na lang  sa pagdayeg  kanila.

* * *

Mas maayo baya  ang plano sa LTFRB  nga  suwayan og  padagan ang Electronic Jeepney (EJ) sa SRP aron usab masukod  kun  unsay  kaayo  nga  idulot  niini  sa publiko ug  sa kalikupan.

Kini tungod kay  sa gawas sa SRP komon na kaayo  ang  de krudo ug de gasolina  nga  mga pasaheroan.

Ang EJ bateriya  ray  gigamit, busa way abog nga  makadaot  sa lawas  sa tawo ug sa palibot  ug  labaw  sa tanan  wa magkinahanglan og enerhiya  nga  sama  sa krudo ug  gasolina.

Kun mamatud-an  kining  maayo kay  sa  mga PUJ nga  gipadagan sa petrolyo, aw mas maayo baya  tingale  nga  padaghanon   kining  sakyanana  dinhi  sa Cebu aron makatabang  sa labi  pang  pagsaka sa  ekonomiya  dinhi.

* * *

Pila na ka yuta  sa Pilipinas  nga  anaa  sa West Philippine  Sea  nga giilog  sa China? Ang Scarborough Shoal nga  gibantayan  pag-ayo  sa  mga  sundawo  sa nasud, tua  na  sa China.

Hilom kaayo  ang  kagamhanan  sa Pilipinas  niini.

Karon  gibombahan og  tubig  ang  mga  mananagat  nga  Filipino didto  sa dapit  nga  teritoryo  pa  sa nasud, apan mura  man og  wa  kaayo  magtagad  ang  kagamhanan  niini.

Gitinguha gayud  sa China  nga mailaha  ang  tanang mga  isla nga  tua  sa South China Sea ug  sa Spratly Islands.

Samtang  ang  mga  Filipinong  magbabalaod busy  kaayo  sa pagbantay  sa kuwarta  sa nasud aron mosulod  sa ilang  bulsa.

Mao  tingale  ang  hinungdan  nga  wa  kaayo  magtagad  ang  mga  dagko  nga  opisyal  niining agresibo  nga  pangangkon  sa China  sa  mga  butang  sa  Pilipinas. Kay imbis  ang  mga butang nga  ilogonon sa  China  maoy bantayan, ang  pundo  na man  hinuon  sa panudlanan  sa Pilipinas  ang  giguwardiyahan ug  gitun-an  aron  unayon  pagbugsik  sa  mga  opisyal  ra usab  sa kagamhanan.

Ang  mga  kabus  nga  Filipino kanunay  nga  nanghuy-ab  sa kagutom ug way mahimo  aron  pagsanta  sa  pagkaut-ot  sa  nasud  tungod  sa kawat  sa gawas  ug  sa sud  nga  nagpungasi.

China ang  kawatan  sa  mga  dagkung  butang  sa Pilipinas  didto sa kadagatan  niini, samtang  mga  dagkong  opisyal  ra  usab  sa gobyerno  ang miunay  paghipus  sa pundo  sa panudlanan  sa nasud nga Pilipinhon.