Diha sa hustong panuigon

Mga tema nga nalambigit niini: Bag-ong sinugdanan, paghamtong, gradwasyon

Adunay mga higayon nga kita magdamgo nga daw nahiagi kita og initiation rite. O dili ba kaha gitudloan kita kun unsaon pagmaneho og sakyanan ug uban pang mga responsibilidad nga iya sa mga hamtong. Ang atong unconscious mind ang nagdapit kanato sa paghimo niini aron kita masayud nga angay na kitang mobarog sa kaugalingon natong mga tiil. Kuyog niini ang tahas ug tawag diha sa kinabuhing hamtong.

Nganong sa Coro man?

Mosamot ang ka-traffic sa port area karon nga anha na sa Qimonda building ihimutang ang mga korte sa Sugbo  human gideklarar ang Palace of Justice nga dili na mahimong magamit human sa Oktubre 15 nga linog.

Mao kini ang gikahadlokan sa mga stakeholders sa puerto, ilabi na sa mga importer kang kansang mga kargamento anha idiskarga sa mga international cargo vessel sa Cebu International Port (CIP).

Atol sa unang Cebu Port Summit niadtong miaging Huwebes sa Casino Español mipadayag sila sa ilang kahingawa niining panaghuot na sa mga container vans sulod sa yarda sa CIP.

Unang gibasol ang bag-ong proseso nga gipatuman sa Bureau of Customs. Sukad gipatuman sa ulahing mga bulan niadtong 2013 ang estriktong proseso, dungan ang spot-checking bisan sa kagamay sa mga customs examiner, nangatanggong ang hilabihan kadaghang mga container vans diha sa yarda sa CIP.

Gihisgutan usab ang transportasyon tungod kay ang mga siyudad sa Sugbo, Mandaue ug Consolacion adunay gipatuman nga truck ban tulo ka oras sa buntag ug tulo ka oras sa hapon.

Mao kini ang hinungdan nga gisugyot ni Atty. Tomas Riveral, ang presidente ug general manager sa Oriental Port and Allied Services Corp. (Opascor) nga ang angay ipatuman mao ang “car ban” ug dili ang “truck ban.”

Sakto bitaw, tungod kay matud pa ni Riveral nga ang mga trak maoy “economic drivers” sa Sugbo unya mao na hinuon kini ang i-ban bisan mao kini nagdala sa mga produkto ngadto sa kalungsoran ug ngadto sa mga pabrika.

Si Heneral Roberto Almadin, ang kolektor sa Customs Cebu, mipasabot ngadto sa mga nanambong sa port summit kalabot sa bag-ong proseso sa customs.

Apan si Atty. Paul Alcazaren, ang deputy collector for operations, mipasabot nga dili bag-o ang proseso sa customs nga gipatuman sukad milingkod si Almadin. Kay matud sa abogado nga mao man gyud kini ang saktong pamaagi sumala sa mandato sa balaod ug sa mga regulasyon, ug ang mga importer ug broker nabag-ohan lang kay naanad man sila sa minugbo apan kinurakot nga paagi.

Angay usab ipadayon ang paghisgot nianang pagtugot og padunggo sa usa ka domestic vessel anha sa CIP ug ang pagtugot sa usa ka local arrastre firm pag-operate sa hurisdiksiyon sa international cargo area sa CIP.

Taym pa, dili ba si Benjie Akol man ang nag-operate nianang domestic arrastre firm atbang sa Land Bank of the Philippines sa CIP?

Dili ba Commissioner man sa Cebu Port Authority (CPA) si Akol? Unya dili conflict of interest nang iyang pag-operate og arrastre firm ug sa samang higayon commissioner siya sa CPA?

Apan alang kanako, kun dili mohimo og halapad nga plano ang CPA alang sa nagtubo nga populasyon ug nagsaka nga ekonomiya sa Sugbo, maghuot og samot ang yarda sa CIP sa magkadaghang kargamento.

Kun ingon ka-ulod ang lihok sa CPA, maulahi gyud kita og samot sa giingon nga ASEAN integration diin ang atong port operations ipuparehas na sa ubang mga nasud sa South East Asia.

* * *

Manghinaot lang ko nga wala’y whitewash kining imbestigasyon sa pagpamanhig patay ni Atty. Noel Archival ug sa duha niya ka mga kaabag didto sa Coro, Dalaguete.

Daghang anggulo nga milutaw sa krimen. Ug ang mga mata sa publiko tua makatutok sa mga kaso nga iyang giatubang.

Gani, ang uban dali kaayong nakahuwes nga may kalambigitan sa ginadiling drugas ang pagpatay sa abogado. Apan dili ko motuo niining mao nga anggulo.

Dungan niini, ang mga tawo sa Facebook ug sa ubang social media nakapangutana kun wala ba kahay simbolo kining pagpangrakrak nga nakaingon sa kamatayon ni Archival duol sa dakong bato sa Coro, Dalaguete, diin gilabay ug nakit-ang patay ang asawa ni PBMA Supreme Master Ruben Ecleo Jr. nga si Alona Bacolod-Ecleo niadtong Enero 5, 2002.

Dili una ko makasakay niining maong anggulo, apan maayo usab tingaleng lili-on ang giingon sa mga tawo nga “simbolo” nganong sa samang lugar diin gilabay si Alona didto gibirahan si Archival kinsa nahimo usab nga abogado ni Ecleo.

Pananglit druglord ang nagbira kang Archival, nganong wala man kini birahi didto sa Dumaguete o sa ubang lungsod nga mas hilom pa kay sa Coro.

Ang Coro niining panahona dili na sama kaniadto nga mingaw kayo.

Kaniadtong seminarista pa ko, gibaklay ko gikan sa Poblacion, Dalaguete paingon sa balay ni Nanay Titay sa Cawayan agi sa Coro, tungod lagi kay nagdukaduka ko nagsakay sa BB Gemma nga bus ug nalapas sa akong kanaugan. Hasta akong buhok miapil og kurog sa kakuyaw tungod sa kamingaw niadtong panahona.

Apan karon nga naglumbay na ang mga beach resort (gani naa diha ang resort ni kanhi Judge Llanos ug balay sa kaubang kolumnista Perry Fajardo) duol sa dakong bato sa Coro, alegre na ang maong lugar ug dili mahutdan og tawo.

Apan wala’y kukahadlok ang mga kriminal sa pagkutlo sa kinabuhi ni Archival sa maong lugar.