Nganong usbon pa man?

Hangtud karon, wala gihapon ko kasabot niining mga lakang pagbalhin sa pagsugod sa klase sa nasud gikan sa Hunyo ngadto sa Agosto o Septembre. Wala ko makakita og insaktong rason nganong angay bang usbon ang sistema.

Didto sa kaulohan, mikisaw ang panawagan pagbalhin sa pagsugod sa school year ngadto sa Agosto or Septembre. Ang University of the Philippines ug ang Ateneo mipadayag na nga sa Agosto na magsugod ang ilang klase.

Gani dinhi sa Sugbo, mipahibalo usab ang kadagkoan sa UP Cebu nga mosunod sila sa kaulohan ug nga magsugod na ang ilang klase sa Agosto. Hinuon ang maong tunghaan pa lamang ang eskuwelahan dinhi sa Sugbo nga mousab sa ilang calendar year.

Tungod lagi aron mapareha ang Pilipinas sa ubang kanasuran, gusto sa pipila nga usbon ang pagsugod sa klase. Dinhi sa Southeast Asia, ang Pilipinas lamang kuno ang adunay school year nga magsugod sa Hunyo.

Ang laing rason, matud pa sa uban, mao nga magsugod na ang ting-ulan sa Hunyo ug dili kuno maayo nga magsugod usab ang klase sa nasud sa panahon nga adunay mga bagyo ug pagbaha.

Apan makaayo kaha kining maong kausaban kun ugaling maaprobahan sa kagamhanan? Ug kun maayo man, unsa may benepisyo nga mahatag niini ngadto sa mga tinun-an ug sa ilang ginikanan?

Alang kanako, wala man siguroy sayop sa naandan tang sistema. Kun ang mga tunghaan sa ubang nasud adto sa Agosto o September magsugod, ila kana nga paagi tungod kay haom kana sa ilang sistema. 

Kun ang kadautan nga panahon maoy hinungdan ngano nga ibalhin gikan sa Hunyo ang pagsugod sa klase, dili ba ting-ulan ug usahay bagyohon man usab ang mga bulan sa Agosto ug Septembre? 

Ug kun mausab gayud ang sistema, obligado gayud nga mauswag usab ang summer classes gikan sa  Abril ug Mayo ngadto na sa Hunyo ug Hulyo. Kataw-anan hunahunaon kun adunay summer classes sa ting-ulan. 

Wala man siguroy dakong rason nganong usbon pa ang naandang sistema. Kini tungod kay dili kini sulbad sa magkagusbat nga kalidad sa edukasyon sa Pilipinas.