Risgo sa propesyon

Si Attorney Noel Archival maoy labing high-profile nga personalidad nga gipatay karong tuiga. Shocking tuod ang iyang pagkamatay gumikan kay wala kuno siya makadawat og hulga sa iyang kinabuhi may kalabutan sa iyang pagpangabogar.

 Tungod sa ka dako sa kaso ning iyang pagpatay, kinahanglan nga dili langayon sa otoridad ang pagsulbad niini aron nga maangkon sa mga pamilya sa maong abogado ug sa ubang biktima ang hustisya.

Kun walay natumbok nga personal nga hinungdan sa iyang pagpamanhig, klaro nga ang iyang pagpatay adunay kalabotan sa iyang propesyon isip abogado. Ug mao siguro kini ang gitutokan sa kapolisan karon. Dili malilong nga isip usa ka inilang defense counsel dinhi sa Sugbo, dakong risgo sa kinabuhi ni Archival ang iyang propesyon. Dili gayud malikayan nga sa iyang pagpanglaban daghan ang iyang maligsan.

Ug angay nga tugkaron sa mga imbestigador ang motibo sa maong pagpamanhig. Kinahanglan nga ilang tutokan ang tanang anggulo nga naglibot sa kamatayon sa maong abogado aron sa daling kasulbaran niini.      

Si Archival usa ka iladong manlalaban. Daghan sa iyang gihuptan mga dagkong kaso dinhi sa Sugbo. Ug tungod niini, dili halayo ang posibilidad nga adunay nag-interest sa iyang kinabuhi.

Sa wala pa siya giambus, gikan si Archival ug iyang mga kauban sa usa ka hearing didto sa Dumaguete City diin siya nangabogar sa usa ka suspetsado kinsa giingong mastermind sa usa ka dakong tulis didto sa niaging tuig.  

Samtang padulong sila sa dakbayan sa Sugbo, mga armadong tawo gikan sa duha ka sakyanan nga nagpasiphig kanila ang mipaarak. Patay diha-diha ang abogado ug usa niya ka staff samtang ang drayber sa ilang sakyanan didto na nabugto-i og gininhawa sa hospital.

Hinuon kumbinsido ang otoridad nga mga professional killers ang namanhig kang Archival. Ug  kugi karon ang kapolisan sa ilang imbestigasyon pagtumbok sa mga mamumuno ug utok sa maong linuog nga krimen.

Manghinaut lamang kita nga masulbad sa daling panahon sa otoridad kining maong dakong kaso.