Bank vans nakaguba sa dan

Taudtaod nang nahimo nga bati ang dalan Horse Shoe Drive nga nahimutang sa Banawa, ning dakbayan. Sukad nga si Mayor Mike Rama na ang nakalingkod sa City Hall, wala na gyud makatilaw sa hamis nga aspalto ang maong sudlunong karsada. Maayo pa sa panahon ni kanhi Tommy Osmeña, diin si Msgr. Roberto “Boy” Alesna sab ang kura paroko niadto sa Alliance of Two Hearts Church kay ginalam gyud ang pagpanindot sa maong dalan.

Apan karon, haskang daghana nag libaong. Mga dagko ug lawom ra ba! Misamot kalaksot ang nahisgutang agianan gumikan sa bagang duot nga bank vans nga anaa gitapok sa plasa duol sa nahisgutang simbahan. Sa sobrang kadaghan sa vans, ang uban anha na lang i-parking laray sa daplin sa daginotong karsada nga maoy hinungdan sa kalangay sa biyahe sa mga pribadong sakyanan nga moagi ning lugara.

Mao gyud ni sila ang nakaguba’g samot sa nahisgutang dalan. Bug-at gud nang mga matanga sa vans. Ug kada-adlaw magsige’g agi. Kana lang dalan nga nahitungod sa ilang dapit-tapokanan, puwerte nang gubaa. Mag-ikis-ikis gud ang dagan sa kotse nga matagbaw’g likay sa libaong. Pero buwasot gihapon. Kay wala na gyud intawo’y kalikayan.

Nindot unta kun masusi ni sa Department of Engineering and Public Works  (DEPW) ug sa mga opisyal sa dakbayan kun nahisubay pa ba ni sa atong balaud kining gihimo sa naasoy’ng mga van. Nindot usab kun mahatagan ni’g dinaliang pagtagad, bisan diyotay man lang, ni Mayor Mike Rama. Buwahan, malipay sab ang mga lumolupyo dinhi nga hagbay rang nag-antos sa kalaksot nga agianan. Kaya ba ni natong hatagan sa atong hustong panerbisyo, Mayor, bisa’g layo pa ang sunod eleksiyon?