Napoles gustong mo-drama sama ni Ecleo?

Ang kamatayon sa inila nga  tawo  sama  ra  sa kamatayon  sa di  inilang tawo, samtang  ang kamatayon  sa tawong  buang sama ra sa kamatayon sa tawong maalamon, ug sa laktud ang kamatayon sa tawo sama ra  sa kamatayon sa mananap, apan ang kamatayon sa tawong anak sa Dios mabuhi  siya alang sa langit, samtang ang kamatayon  sa tawong di anak sa Dios mabuhi siya alang sa impiyerno, busa  matud pa sa Dios, “pilia  ang  kinabuhi samtang  buhi ka pa”.

Si  anhing  Atty. Noel Archival gipatay sa sakit nga matang sa kamatayon. Maayo unta kun sa buhi pa siya nangita siya daan sa  kinabuhi kay sa pagbalik ni Cristo mabuhi siya paingon sa langit, apan kun wa,………….

* * *

Daghan ang mga desisyon sa kagamhanan nga mahug ra sa gitawag nga “trial by error”.

Kini sa pagtuo sa kadaghanan  nga may positibong bunga, apan sa kaulahian mas bug-at pa ang problema nga sagubangon sa kadaghanan tungod sa di maayong  pagpakanaog og desisyon.

Sama sa oil deregulation law nga gituyo sa goberno aron  nga di mosaka ang prisyo sa lana, kaniadtong tag-P35 pa ang  litro sa gasolina. Apan dihang gipatuman kini , misaka ang prisyo sa lana ug hangtud karon  dul-an na sa P60 matag  litro sa gasolina.

Ang Mindanao giharian sa nagkalainlaing grupo sa mga Muslim kansang init nga taras gitumong sa  pagpanggubot sa mga Kristiano.

Adunay grupo sa mga Muslim nga tulisan, may kidnapper, may para  gubat ug sa laktud ang pagmugna og balaud alang sa pakighigala sa usa lamang ka grupo sa mga Muslim, di sulbad sa kagubot sa Mindanao, kay samukon ra gihapon kini sa   ilang  kadugo  nga  samokan.

* * *

Giingon nga mihangyo si Janet Lim Napoles  nga ma-permanente sa hospital pinaagi sa”hospital arrest”, nga mura’g ma-konsiderahan tungod kay daghan kaayo siyang suod nga  mga  opisyal sa goberno.

Gani miingon si PNoy nga ipasiguro lang nga maysakit  siya aron nga matuman ang iyang gusto.

Si Ruben Ecleo kaniadto , tungod kay kuwartahan mao ra usab kini ang gihimo niyang taytayan aron  makaipsot gikan sa  kalaay sud sa selda.

 Dihang mipahayag ang  doktor nga sama na si Ecleo sa usa ka bomba nga gamay nalay kuwang  mobuto na, o sa laktud kun di kabuhian, mamatay gyud siya, aw dali kaayo nga nadesisyonan nga pagawason siya  sa prisohan.

Didto sa gawas, sama si  Ecleo sa usa ka langgam nga human buhii  gikan  sa halwa, malipayon na kaayo, ug wa na mangandoy nga mobalik pa sa prisohan. Sa kagawasnon ni Ecleo, mikurog ang tanang otoridad  nga way nakasikop kaniya tungod kay nahadlok nga patyon ang magtinguha sa pagdakop kaniya.

Ingon gihapon niini ang  malagmit mahitabo ni Napoles, nga kun  palihukon na ang binilyon ka pesos nga kuwarta niini, hayan nga  mawagtang ra kini sa listahan  sa  kagamhanan isip utok sa labing dako nga tulis sa buhis sa katawhan nga napatik sa kasaysayan  sa nasud  sukad-masukad.

* * *

Gusto sa mga kawani sa Cebu City hall nga makadawat og bonus karong Charter Day apan nakamatngon si Mayor Mike Rama nga bag-o pa kini silang midawat og Christmas bonus  sa miaging Disyembre busa mibalibad ang mayor.

Mas maayo usab tingale nga hatagan og sulbad sa mayor ang mga bug-at nga suliran sa siyudad kay sa problema sa mga  kawani sa city hall.