EDITORYAL - Risgo sa mga drayber

Bisan pa og dili tinuyo sa drayber nga makadam-ag siya’g tawo sa iyang pagmaneho’g sakyanan, base sa balaod manubag gihapon ang mga drayber.

Kun wala sila’y criminal liability sa pagkamatay o kaha pagkaangol sa tawo nga ilang madam-agan, apan aduna sila’y civil liability nga mao ang pagtubag sa panginahanglan sa ilang madam-agan.

Pananglit, sila maoy moabaga sa bayranan sa ospital sa tawo nga ilang maligsan o madam-agan sa ilang sakyanan. Bayaran usab nila ang mga adlaw nga wala makatrabaho ang biktima.

Mao kana ang risgo nga giatubang kanunay sa mga drayber kun magmaneho og sakyanan. Apan daghang mga drayber ang wala makahuna-huna niini mao nga nagpaturagas lang sila pagpadagan.

Apan adunay mga hitabo sa kadalanan nga maisip nga ang mga drayber maoy biktima, apan sila gihapon ang makabayad. Sama nianang mga bata nga anha sa karsada magduwa og roller skates, o roller blades.

Dayag kaayo sa mga mata sa atong mga tinugyanan sa balaod nga kining mao nga mga bata naghatag lang og risgo sa mga drayber.

Tukma lang nga ang mga traffic enforcers mosakmit sa mga roller blades niining mga batan-on nga anha sa karsada magduwa ug sila pabayron og multa.

Unsaon, ang atong kagamhanan ingon sa nagkuwang sa ilang kaakohan. Wala sila magbutang og dapit nga adto ang mga bata magduwa diha sa tagsa-tagsa nila ka dapit mao nga anha na lang sila sa karsada.