EDITORYAL - Maghuwat pa mo’g reklamo?

Adunay lagda ang kagamhanan nga ang tanang public utility vehicles (PUV) sama sa taxi, passenger jeepneys, bus, trak de-karga, vans for-hire ug uban pa, kinahanglan nga adunay parking area nga adto ang mga sakyanan ibutang kun dili na gamiton.

Subo kaayo huna-hunaon nga ang Land Transportation Franchising and Regulatory Board (LTFRB), ang Land Transportation Office (LTO) ug ang mga opisyal sa tagsa-tagsa ka local government units, wala magtagad sa kapakyas sa mga tag-iya og sakyanan nga motuman sila sa balaud.

Ang LTFRB padayong nangisyu og mga prangkisa ngadto sa mga gusto nga mag-operate og PUV’s nga wala nila siguroa ang mga aplikante aduna ba’y tukma nga gidak-on sa parking area sa ilang sakyanan.

Kun suroyon nimo ang lainlaing mga dapit panahon sa gabii imong makita nga ang mga sakyanan anaa lang giparking daplin sa karsada nga klaro kaayo nga makasamok ug makababag kun may emerhensya nga panghitabo.

Wala na lang ba g’yuy paagi nga mahuna-hunaan ang LTFRB gawas sa kanunay’ng pag-ingon nga kuwang sila’g mga empleyado nga mohimo’g inspection sa dili pa aprobahan ang aplikasyon sa gusto nga mokuha’g prangkisa?

Unya ngano’ng wala man usab mohimo’g paspas nga kampanya ang atong mga opisyal sa kagamhanan, sama sa CITOM? Angay’ng rebokahon sa LTFRB ang prangkisa sa mga bakakon nga PUV operators?

Maghuwat pa ba g’yud kamo nga adunay moreklamo usa kamo mohimo'g aksyon?