Suporta sa Olympian

Wa’ igdungog ang panga’n ni Michael Christian Martinez kaniadto.  Nangangha na lang ‘tang tanan dihang nagbukas ang Winter sa Olympics sa Sochi, Russia nga adunay nag-inusarang Pinoy nga nisu’d sa Olympic games bitbit ang bandila sa Pilipinas uban ang iyang inahan ug lain pang duha ka tawo sa iyang nag-inusarang team. Makapanlibawot sa balhibo nga nahitabo ning tanan ug nahatagan og luna ang nasud sa usa ka prestihiyosong duwa sa kalibutan kansang mga nasud nga nisalmot—adunay snow.  Kinsay di’ matinga’ nga adunay ice skater gikan sa Pilipinas nga nabantog tungod kay usa ‘ta ka tropical nga nasud.

Sa iyang edad nga 17, daghan ang nagtuo nga makasu’d si Martinez ug makalangkat og medalya.  Ako sa akong kaugalingon, maglisud sa pagtuo nga makakuha og medalya ang usa ka batan-on natong pambato sa nasud.  Dakong garbo na alang nako nga nasu’d siya sa finals ug niabot sa ika-19 nga pwesto sa figure skating for men.  Si Michael ang labing bata sa iyang kategoriya ug dakong garbo na nga ang batan-on gikan sa usa ka nasud nga wa’y snow makahatag og usa ka nindot nga presentasyon atubangan sa daghang mga tawo sa tibuok kalibutan.

Sa nga’n pa lang nga naggikan sa Pilipinas ug nisalmot og Winter Olympics, dakong sugilanon na alang sa kalibutan.  Kini ang hinungdan nga wa’ pa gani magsugod ang kompetisyon hangtud na sa iyang labing unang pagtahak sa bugnaw nga ice skating rink, nakasentro na ang atensyon sa international media sa usa ka Pinoy nga nihatag sa iyang katakos sa usa ka sport nga daw imposibleng mahimo nato.   Apan si Martinez, gikan sa ice skating rink sa mall, nilandig sa labing lapad nga arena nga maoy damgo sa mga sama niyang skater atubangan sa minilyon ka mga tawo nga nagtan-aw sa telebisyon.

Luyo sa sugilanon ni Michael, mao ang pait nga kamatuoran sa sports program sa nasud.  Salamat sa gipakitang katakos sa mga Pinoy sa tibuok nasud nga sama ni Michael, mas naila pa ang atong kaliwat.  Apan unsa pa kaha kalapad ang madawat nga kalampusan kung aduna pay mas lapad nga suporta ang gobyerno sa atong mga atleta.  Nigawas man gani ang mga sama ni Michael ug naila sa kalibutan bisan kun wa’y medalyang nadaog, unsa pa kaha kung adunay hingpit nga suporta gikan sa gobyerno?   Nakawara-wara man gani sa bandila sa nasud sa international sport arena ang mga Pinoy sa tabang sa pamilya ug mga pribadong kompaniya, unsa pa kaha kung adunay hingpit nga suporta ang gobyerno?

Di’ malalis ang talento ug katakos sa mga Pinoy halos sa tanang aspeto sa sports ug mga talento.  Apan unsay mga programa nga angayan pa untang tukoron sa gobyerno?  Mas dako og matabang kung adunay unibersidad ang nasud kansang tumong mao ra gyud ang pagtabang sa mga Pinoy talents ug athletes nga mamahimong world class.  Pagkanindot kung mogahin ang gobyerno og pundo aron nga mas andam pa ang mga Pinoy nga mosabwag sa iyang bituon sa tibuok kalibutan ug mahibaw-an ang iyang katakos sa halos tanang aspeto?  Karon, daghang atleta ang di’ makwestyon ang katakos apan sila ‘sab ang labing problema sa ilang matrikula, sa ilang suporta sa pamilya, sa ilang mga ekipo, sa ilang training ug sa daghan pang mga butang nga mao untay mag-umol nila ngadto sa labing respetadong talent ug sport enthusiasts sa kalibutan.

Kung mao ni ang himuon sa gobyerno, ugma damlag di’ lang ‘ta maila sa atong mga  Overseas Filipino Workers kung OFW nga nagserbisyo sa mga tawo sa kalibutan.  Mas maila ta sa talento ug katakos sa ubang butang.  Kung atong madaog ang mga international competition, daghang talento pa ang maaghat sa paggawas ug pagpakita niini sa kalibutan.  Kung adunay hingpit nga suporta gikan sa gobyerno, mas daghang Michael Martinez pa ang atong mailhan, ug daghang mga sport heroes pa ang atong mapaila-ila sa kalibutan.  Sila ang mga tawo nga mobag-o sa nawong ug pagsabot sa ubang kanasuran sa atong nasud.  Kung mahatagan lang unta og igong suporta ang mga umaabot nga Olympian…

Email: [email protected] or [email protected]