EDITORYAL - Smoke-emission test

Kun mobarug ka sa karsada bisan sulod lang sa usa ka oras imong mapanid-an nga moitum ang lungag sa imong ilong tungod sa aso gikan sa mga sakyanan nga imong mahanggap.

Nagpasabot kini nga hugaw kaayo ang aso  nga gibuga sa tambutso sa mga sakyanan, sagad mga trak de-karga ug passenger jeepneys.

Adunay mga sakop sa City Traffic Operations Management (CITOM) nga panagsa mohimo og road-side smoke test sa mga sakyanan. Sagad sa ilang parahon mga trak de-karga ug PUJ.

Apan nganong hangtod karon wala gihapon maundang kining problemaha? Dili ba posible nga gipapasar lang sa mga smoke emission testing centers ang mga sakyanan nga nagbuga og itum nga aso basta mohatag lang og suborno ug makabayad sa ilang testing fee?

Nganong dili man estriktohon nga kadtong mga sakyanan nga magbuga og itum kaayo nga aso tanggongon g’yud ug dili na tugotan nga makadagan gawas kun ipaayo ug dili na magbuga og itum nga aso?

Ang drayber sa mga sakyanan nga magbuga og itum kaayo nga aso maoy labing gara mopadagan. Bulhot-bulhot ang ilang pagpadagan mao nga mosamot nga mobuga ang makina og itum kaayo nga aso.

Adunay mga sakyanan nga bag-ohay pa na-renew ang rehestro apan makita nimo nga nagbuga gihapon og itum nga aso. Nagpasabot nga dili tinuod ang resulta sa smoke emission test.

Kun ingon niini ang sitwasyon, maayo pa og wad-on na lang ang smoke-emission testing centers.