Pag-usab sa klase

Gitinguha karon sa pipila ka mga unibersidad sa kaulohan ang pag-usab sa bulan alang sa pagbukas sa klase nga tingtungha sa duha ka   katarungan nga naglakip sa pagpahaum sa kahimtang sa panahon ug  pagsundog sa bulan sa pagbukas sa klase sa uban nga mga nasud sa tibuok kalibotan. Ang pagbalhin sa bulan sa pagbukas sa klase sa matag tuig nga tingtungha unang gikataho dihang gipalabang sa pipila ka mga kongresista sa Ubos Balay Balaoranan nga mipalabang og balaod nga maoy gihapin nga katarungan ang kahimtang sa panahon sa nasud nga Pilipinhon.

Si Cavite 2nd District Rep. Lani Mercado-Revilla maoy usa sa  misugyot sa maong balaodnon pinaagi sa House Bill No. 104  nga nagsugyot sa pag-usab sa school calendar ug iyang gihapin ang katarungan nga gitumong kini alang sa paghatag og kasiguroan sa mga tinun-an ug mga magtutudlo sa matag tulunghaan dili nga masugamak sa mga pagbaha  ug sa motakboy nga balatian nga makuha sa tubig.

Dugang pagpasabot ni Kongresista Mercado-Revilla nga sa naandan nga pagbukas karon sa klase  gawas nga mahulga ang mga tinun-an sa pagbaha ug mga sakit nga makuha gikan sa tubig mao nga masinati usab ang pagkabalda sa klase kay matumong man ang bulan nga moigo ang bagyo ug ang kanunay nga pagbaha nga makahatag og kakuyaw sa mga magtutudlo ug mga bata nga nagtungha.

Gitataw ni Kongresista Mercado-Revilla nga ang pag-usab sa school calendar   dinhi sa nasud makatabang kini sa paglikay sa mga tinun-an ug mga magtutudlo batok sa motakboy nga balatian gikan sa tubig nga naglakip sa respiratory disease, dengue fever ug leptospirosis ug labaw na nga kalikayan usab nga mabalda ang klase sa kabataan nga nagtungha.

Ang Philippine Atmospheric Geophysical and Astronomical Services Administration (PAGASA) miingon nga anaa sa 19 ngadto sa 20 ka   bagyo ang moigo sa  Pilipinas  sa matag tuig nga sagad sa bulan sa Hunyo ngadto sa Septiyembre.

Dugang nasayran nga sa mga Asian countries ang Pilipinas ug Brunei ang nagbukas sa klase sa Hunyo nga nagsukwahi sa mga nasud sa Malaysia ug Singapore ang Enero ang pagbukas sa ilang klase , ang China sa Pebrero, South Korea  sa Marso, Japan ug India sa Abril, Thailand sa Mayo, Indonesia sa Hulyo ug   ang Hongkog sa bulan sa Septiyembre.

Sa pagbalhin sa bulan sa pagbukas sa klase dinhi sa nasud mabalhin usab ang bulan nga tingbitay sa mga iro nga mao ang Hulyo nga buot ipasabot sa atong katigulangan nga sa maong bulan daghang  ginikanan ang magkalisod sa kuwarta kay nahurot na sa bulan sa Hunyo sa pagbayad sa matrikula sa ilang mga anak nga nagtungha.