Pinoy kini

Gihatagan og masipang pakpak, sa daghang nanan-aw sa figure skating competition didto sa Iceberg Palace sa Sochi, Russia, ang performance sa Pinoy ice skater nga si Michael Christian Martinez.

* * *

Si Michael, 17 anyos, maoy labing batan-on nga skater sa Sochi winter olympics ug giingong maoy labing wala’y eksperyensya, apan naka-iskor og dako-dako nga nakapasud niya sa medal round of 24.

* * *

Bisan naglisud siya sa pagsakmit og medalya, ang pagkasud ni Michael sa round of 24 igo nang ikapanghambog nato sa mata sa kalibutan. Si Michael maoy bugtong taga Southeast Asia sa programa nga iyang giapilan.

* * *

Ug si Michael gikan sa nasud diin wala’y snow kon yelo ug misugod ra siya sa pag-ice skating sa ice skating rink sa usa ka shopping mall sa Manila.

* * *

Human sa iyang dalaygon nga performance didto sa Sochi olympics, si Michael mapasalamaton sa iyang katagi-nasud nga Pilipinhon gumikan sa ilang suporta ngadto kaniya. Apan ang nasud angay nga mapasalamaton usab kaayo ngadto kaniya tungod sa kadungganan nga iyang nahatag kanato.

* * *

SA LAING BAHIN...Dunay duha ka half-Pinoy nga mi-istaring sab sa Sochi Winter Olympics apan Amerika ug Canada ang mga nasud nga ilang girepresentahan...Daghang salamat sa atong mga magbabasa sa Bohol diin nagpadayong pag-umento sa atong sirkulasyon.