EDITORYAL - CitiCenter angay’ng biyaan

Gimandoan sa Cebu City Hall clearing team ang mga squatters nga nagtukod og balay sulod sa karaang CitiCenter Commercial Complex sa Barangay Kamagayan nga molayas na sila gikan sa mao nga dapit.

Ang mao nga luna gipanag-iya na karon sa dakbayan sa Sugbo human nga ang kanhi tag-iya niini wala mobayad og buhis sa City Hall mao nga gisubasta pagbaligya ang mao nga yuta ug building.

Kay wala ma’y mipalit sa yuta nga kanhi gigamit nga merkado, ang balaod naglatid nga “automatic” nga ang dakbayan mao na ang tag-iya ug nakapalit sa yuta apan mahimo gihapon nga lukaton pagbalik sa tag-iya sa dili pa molapas ang usa ka tuig.

Tukma lang nga papahawaon na ang katawhan nga anaa magpuyo sa karaang CitiCenter Complex kay gamiton na man sa dakbayan ang mao nga property.

Karon nga iya na sa dakbayan ang property, angay’ng gamiton g’yud kini sa mga proyekto nga kapahimuslan sa kadaghanan ug dili kay alang ra sa pipila ka tawo nga libre sa ilang pagpuyo diha.

Kun tugotan kining mao nga mga pamilya nga makapadayon pagpuyo sa mao nga luna, susama ra nga gihatagan sila’g pabor sa kagamhanan ug dili kini makiangayon sa uban.

Wala usab malilong sa City Hall nga ang ubang mga tawo nga nagpahimulos sa pagpuyo diha sa karaang merkado nalambigit og illegal nga kalihukan sama sa prostitusyon ug pagbaligya’g illegal nga drugas.