Tungod sa bulak

Ang magsuong Gilda ug Adela (ilang apelyido gipugngan) tua na karon nagtrabaho sa Amerika human sa ilang pagkahuman sa ilang kurso nga Pharmacy (BS Pharm). Mga anak sila sa ordinaryong mag-uuma.

* * *

Istorya sa magsuon ngadto sa ilang mga nahigala sa ilang gitrabahuan nga nakahuman sila sa Pharmacy gumikan lang sa bulak. Ang ilang ginikanan adunay gamay’ng luna sa yuta didto sa Negros Or. diin gitamnan og mga buwak sa ilang mag-uumang amahan.

* * *

Nakagusto man kuno ang nagkadaiyang buwak sa matang sa ilang yuta sa Negros  ug misanay ang ilang mga rosas, carnation, sunflower ug uban pang klase sa buwak.

* * *

Pila may istorya, nakakita ang ilang inahan og flower shops sa Dumaguete ug Bacolod nga nahimo nilang regular customer sa ilang mga buwak ug tungod sa demand sa buwak sa duha ka flower shops, napugos sila (papa ug mama) sa pag-expand sa ilang uma sa kabulakan.

* * *

“Gigrasyahan kami pag-ayo sa Ginoo kinsa wa magpabaya kanamo sa among pagtuon,” suma pa ni Gilda. “Wa gyud mi maglisud sa among schooling gumikan sa kakusog sa among negosyo sa buwak,” puno pa ni Adela. “Buwak gayud ang nakapahuman namo pag-eskuyla,” matud pa sa magsuon.

* * *

Suma pa  nila tungod sa grasya sa Ginoo ang negosyo nila sa buwak wala mag-agad sa season sama sa Valentine’s Day, All Saints/Souls Day, graduation day, etc. “Year round ang among flower business,” nila pa.

* * *

SA LAING BAHIN ... Dinhi sa ato mokusog ang pinalitay sa buwak inigka duol na sa Valentine’s Day ug natural lang nga mosaka sab ang presyo ... Happy Valentine’s Day sa atong mga suking magbabasa sa tanang dapit sa Sugbo. Salamat sa inyong suporta.