Labangon gising!

Maayo kay gisugdan na sa Cebu City Hall ang pagpatambong og seminar sa mga opisyal sa barangay aron masayod sila sa ilang katungdanan pagpatuman sa balaod kabahin sa tukma nga paghipos sa mga basura. Ang tinuod kun molihok lang gayud ang mga opisyal sa barangay hingpit nga mapatuman ang tukma nga paghipos sa mga basura sa tagsa-tagsa nila ka dapit.

Apan daghang mga opisyal sa barangay kuwang og pagpakabana pagpatuman sa gilatid sa Republic Act 9003, ang Ecological Solid Waste Management Act.

Gani, adunay mga higayon nga sila pa nga mga opisyal sa barangay ang moawhag sa mga Barangay Environmental Officers (BEO) nga dili pamultahon kadtong suod nila nga lumulopyo nga madakpan sa pagpataka og labay sa ilang basura.

Sa imong pagtimbang-timbang, husto ba ang ilang gibuhat? Kanus-a man makakuha og respito ang katawhan kanila? Kun ako maoy pasultihon dili g’yud ko motahud kay pili-pilion ra diay ang pagpatuman sa balaod?

Ambot kamo diha, makagusto ba kaha kamo sa batasan sa mao nga mga opisyal nga pasayloon ra ang iyang mga suod nga higala samtang ipadakop g’yud ang mga dili sigurado nga iyang dumadapig.

* * *

Kay naghisgot na man g’yud ta og basura, pastilan kining mga opisyal sa Barangay Labangon nga gipangulohan ni Kapitan Victor Buendia kanunay ra nga wala mohipos sa mga basura nga magliundok ra diha sa dalan Tres de Abril.

Unsa, wala mo’y trak sa mga basura nga magamit sa paghakut? Kun moingon kamo nga kuwang ang inyong panggasto alang sa mga garbage truck sa barangay, mangutana ko kun nangayo ba kamo sa City Hall?

Kun kini man gani maoy inyong problema, sultihi ko pananglit nangayo kamo og fuel sa City Hall unya gibalibaran kay dabo-dabohan nato sa pagsaway si Mayor Michael Rama ug ubang opisyal. Grabe na man gud kaayo. Kanunay ko nga makaagi diha sa Tres de Abril nga magliundok ang mga basura nga wala mahakut panahon nga maghatud ko sa akong anak nga nagtungha sa Cebu Institute of Technology (CIT) University.    

Kun pananglit wala na kamo’y trak nga magamit aron hakotan sa mga basura, pagsulti. Nahinumdom ko nga duna mo’y reklamo sa City Hall nga wala hakuta ang inyong basura apan ang pangutana, kamo nanghakut kaha mo sa mga basura?

Kapait usab ninyo nga mga opisyal sa Labangon nga nakaako ra kamo nga gatan-aw nianang mao nga mga basura nga gilangaw na lang daplin sa karsada. Usbon nako, kun nagkuwang mo’g gasolina o krudo alang sa inyong garbage truck, adto sa City Hall pangayo ug kun dili mohatag pahibaw-a ko kay wiktan nato ang mayor.