Unsay buhaton kun sayup ang petsa sa imong natawhan sa birth certificate?
Nahimong common nga problema sa atong kaigsuonan ang sayop nga mga entry sa ilang birth certificate. Ang uban niini sayop ang spelling sa ilang mga pangan ug apelyido, ang uban sayop og gender inay babaye nahimong lalaki sa ilang birth certificate, ang uban sayop sab og petsa sa ilang adlaw’ng natawhan. Apan unsa bay imong buhaton karon kun gusto nimong ipausab ang entry sa imong birth certificate? Kinahanglan pa ba kining moagi sa korte? Kana nga pangutana ang atong tubagon karon dinhi ning atong column.
“Dear Atty. Divine;
Aduna unta ko’y problema labot sa akong birth certificate nga nasayup sa pagbutang ang akong birthday. Natawo ko niadtong November 5, 1975 apan ang nabutang sa akong birth certificate November 25, 1975. Gusto unta nako kini nga kurihi-an apan unsa may akong buhaton? Moagi pa ba kini sa korte? Pila man kaha ang akong magasto niini? Hinaut nga imong matubag ang akong pangutana. Salamat daan attorney.
Lettyâ€
Dear Letty;
Kaniadto kun adunay sayop nga entry sa imong birth certificate moagi gyud ka sa korte. Apan karon mas sayon kurihian ang entry sa imong birth certificate tungod sa Republic Act No. 10172 nga diin ang pagkurihir niini di na moagi sa korte kondili adto ra nimo ipasaka sa Local Civil Rigistrar. Basi sa maong balaod, ang mga clerical ug typographical errors, pag-usab sa first name ug nickname, pag-usab sa buwan ug petsa sa natawhan ug sa gender sa usa ka tawo adto ra kini usbon sa Civil Registrar sa inyong Munisipyo o syudad diin ka marehistro. Busa ang maayo nimong buhaton karon mao ang pagpasaka sa imong Petition alang sa correction sa entry sa imong birth certificate sa Local Civil Registrar diin ka marehistro. Aduna na silay form daan nga imo na lang i fill-up.
Ang imong Petition kinahanglan imong apilan sa kopya sa imong birth certificate nga nasayup ug sa page sa registry book nga dunay sayop nga entry nga gusto nimong ipausab, apilan sab nimo og mga dokumento nga nagpakita sa imong tinuod nga birthday ug uban pang dokumento nga magsuporta sa imong Petition. Mamahimo sab nimong apilan ang imong Petition sa imong school records, baptismal certificate ug uban pa nga nagpakita sa imong husto nga adlaw’ng natawhan. Kinahanglan sab nga ipa-publish ang imong petition og kaduha sa newspaper.
Kinahanglan sab ka nga mosumiter og Police or NBI clearance or Court Clearance pagmatuod nga wa kay giatubang nga kaso. Ang Petition alang sa pagkurihir sa birthday adunay bayranan nga 3 mil pesos wa pay labot niini ang gasto sa publication. Hinaut nga akong natubag ang imong pangutana. Daghang salamat and God Bless.
Atty. Divine
Kun ikaw adunay pangutana, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana matag adlaw’ng Miyerkules ug Domingo pinaagi sa akong column.
- Latest
