CITOM mo-deputized pa g’yud

Nindot ang paagi ni CITOM operations chief Joy Tumulak nga dugangan ang pwersa sa mga traffic enforcers pinaagi sa pagkuha og deputized agents nga langkoban sa mga opisyal ug kawani sa barangay.

Pagka karon, pwerteng daghana na g’yud sa mga drayber nga miabuso sa pagmaneho sa ilang sakyanan nga angayang tudloan og leksyon. Kagahapon sa buntag didto sa atubangan sa simbahan sa Mabolo, usa ka drayber og PUJ mo “U-turn” unta bisan og naghuot ang sakyanan.

Resulta, samtang nagpaabot siya nga makaliko, nababagan ang mga sakyanan nga nagsunod sa mao nga PUJ. Maayo gani kay diha’y tawo nga nanaug sa iyang gisakyan ug mibadlong sa mao nga PUJ drayber.

Dili buta kadtong mao nga PUJ drayber nga wala makakita sa “No U-turn sign” nga anaa g’yud taliwala sa karsada gipabarug. Ang kaabusado ra g’yud nga dili motuman sa balaud.

Kaniadtong miaging Biyernes, may naagian ‘sab ko nga motor nga giasikaso sa usa ka technician sa tigbaligya og motorcycle spareparts diha sa dalan D. Jakosalem. Nagtaud kini og blinker sa motor.

Akong gibadlong ang technician ug giingnan nga wala itugot sa balaud ang iyang gihimo nga pagbutang og blinker sa motor apan igo ra man kuno siya gibayran. Pagtan-aw nako sa plate numbers, gitaptapan pa g’yud og itum kaayo nga glass nga dili na mabasa.

Abusado kaayo ang tag-iya sa mao’ng motor ug angayan kini nga tudloan og leksyon. Dinhi nga bahina nga kun makakita ko og mga malapason sa balaud nga mga motorista unya tan-awon lang sa mga traffic enforcers, dili ko makapugong sa pagpanghupaw.

Ang nindot mao nga ang kadagkoan sa CITOM maniid kun kinsa sa ilang mga traffic enforcers nga deputized sa Land Transportation Office (LTO) ang dili modakup sa mga dakponon aron pahunongon na lang sa pagtrabaho.

* * *

Kabahin sa pagkuha og daghang deputized agents, usbon ko, nindot kini nga paagi kay sa tanang dapit duna na may makatabang pagpahapsay sa trapiko. Apan kinahanglang tudloan g’yud sila pag-ayo sa ilang trabaho.

Ako bitaw sa wala pa mahimong deputized agent sa LTO kaniadto, daan na ako nga nagbasa sa mga lagda nga gilatid sa Republic Act 4136 kon Transportation and Traffic Code.

Mahinungdanon nga gawas sa pagtambong og seminar, kinahanglang mobasa ug magtoon gayud ang mga deputized agents, aw bisan na ang mga regular nga traffic enforcers.

Daghang mga traffic enforcers nga kuwang pa kaayo og kahibalo sa mga lagda, ilabi na ang mga gilatid sa Republic Act 4136.