EDITORYAL - Bungtod sa mga ‘Ukay-ukay’

Gikagubtan sa katawhan ang nagtipun-og nga mga ginamit nga sinena gikan sa laing nasud nga giladlad ra sa dakung hawan diha sa Cordova nga anha ang mga tawo mag-ukay-ukay aron mamili sa ilang gusto nga paliton.

Ang pagpalit og mga ginamit nga sapot nga kaniadto gitawag og “relief goods” nauso na kaniadto pa. Bisan  ang mga kwartahan dili na karon mauwaw nga mosulod sa mga tindahan og “ukay-ukay” aron mopili og ilang magustohan.

Apan ang pamaagi sa tag-iya sa mao nga mga ginamit nga sapot nga gihuwad ra nila sa dakung hawan ang mao nga mga sinena, nga ang lugar wala gani atup, makapaubos pag-ayo sa pagtan-aw sa mga langyaw kanato nga mga Filipino.

Gipunsisokan kanunay sa katawhan ang mao nga nagbungtod nga mga sinena, ilabi na nga gibaligya ra kini sa ta’g P5 ngadto sa P15 ang matag sapot, depende sa kalidad.

May nagduda nga kining mao nga mga sapot nga gihuwad ra diha sa dakung hawan sa Cordova mao kini ang mga wala mangahalin nga “ukay-ukay” diha sa lainlaing baligyaanan.

Mi-click tuod ang gimik kay pagkadungog sa katawhan nga adunay daw bungtod sa mga sinena nga gibaligya sa barato ra nga kantidad sa Cordova, daghan ang miadto aron mamili.

Apan ang maayo unta nga ang nagbaligya niining mao nga mga sinena mibutang sa mga sapot sa dapit nga adunay atup nga dili mora’g linabay na ang mao nga mga baligya.