EDITORYAL - Operation Plan Red Plate

Matag karon ug unya, makakita kita og mga sakyanan nga gipanag-iya sa kagamhanan nga magdagan-dagan bisan lawom na nga gabii. Ang uban niining mao nga mga sakyanan anha makita duol sa mga imnanan.

Ang mga sakyanan sa kagamhanan gipagamit sa mga kapitan ug konsehal sa barangay, ang uban ‘sab giisyu ngadto sa mga opisyal sa dakbayan ug lainlaing ahensya sa kagamhanan.

Adunay lagda ang Commission on Audit (COA) nga ang mga butang sa kagamhanan, apil kining mao nga mga “red plate” nga sakyanan gamiton lang gayud sa publiko nga kalihokan.

Apan dayag kaayo ngadto sa publiko nga adunay mga sakyanan sa kagamhanan nga gigamit-gamit paghatud ug pagkuha sa kabataan gikan sa balay sa hingtungdang opisyal ngadto sa tunghaan, ug gikan sa tunghaan pauli sa balay.

Wala gayud kini mahunong kay unsaon, “Off and On” ang kampanya sa Ombudsman sa gitawag nila og Oplan Red Plate.

Kaniadto, ang Ombudsman nakigtam-bayayong sa COA paghimo og operation aron dakpon kadtong mga tawo nga migamit og sakyanan sa kagamhanan sa personal nga katuyoan.

Ingon sa nalimot na ang Ombudsman nga gitahasan sila paghimo’g kampanya aron matudloan og leksyon kining mga mapahimuslanong opisyal ug kawani sa kagamhanan?

Unya na ba kamo molihok kun sawayon na sa media mahitungod sa kapakyas ninyo pagtuman sa inyong katungdanan?     

Angay nga ang Ombudsman mobukhad na sa nagyugpos nila nga mga bukton.