Makadawat ba og retirement ang self-employed member sa SSS?

Ang pagpamiyembro sa SSS mandatory kini alang sa mga empleyado sa pribadong sector basi sa Republic Act 8282 kon Social Security Law of 1997. Ang employer o kompaniya obligado gyud nga mopamiyembro sa iyang mga kawani sa SSS. Gawas sa mga employed worker mamahimo sab nga magpamiyembro sa SSS ang mga self-employed. Apan makadawat ba sab og pension ang mga self-employed nga member? Kana nga pangutana ang atong tubagon karon sa atong column.

Dear Atty. Divine;

Aduna lang unta koy pangutana labot sa SSS, miyembro ko sa una sa SSS apan nahunong kay wa na man ko magtrabaho. Gihimo ko nga beneficiary sa akong bana kay siya man karon ang nagtrabaho, plano unta nako nga ipadayon ang akong SSS, apan ang akong pangutana kun maka-avail ba ko sa retirement benefit sa SSS bisan kun voluntary member or self-employed ra ko? Unsa may mas maayo attorney, akong ipadayon ang akong SSS or di na lang tungod kay beneficiary man ko sa akong bana?Kun mopadayon ko sa pag- contribute pila man sab ang akong bayran matag buwan? Hinaut nga imong matubag ang akong pangutana. Daghang Salamat. — Totsie

Dear Totsie,

Mas maayo nga imong ipadayon ang imong contribution as self-employed or voluntary member aron maka-avail ka sa ubang mga benefits sa SSS sama sa multi-purpose loan, maternity benefits ug uban pang benepisyo sa mga miyembro. Kun beneficiary ka lang sa imong bana dili man ka makapahimus sa ubang benefits nga alang lang sa mga active members ug besides sayang sab ang imong na-contribute kun dili nimo ipadayon. Bisan kun self-employed or voluntary member ka lang maka-avail gihapon ka sa retirement benefits sa SSS as long as you are already 60 years old and you have paid at least 120 monthly contribution kon 10 years nga contribution so qualified ka na nga makadawat og monthly pension gikan sa SSS basi sa Republic Act No. 8282 kon Social Security Law of 1997. Buot ipasabot nga ang retirement benefits dili na exclusive lang sa mga miyembro sa SSS nga dunay trabaho kondili lakip na usab sa mga self-employed. Kun pananglitan dili makaabot og 120 months ang imong nabayran sa SSS unya miabot na ka og 60 or 65 years old, dili ka maka avail sa monthly pension pero makadawat ka sa lump sum sa imong total contribution plus interest. Kun mag self-employed ka mas maayo nga moadto ka sa SSS aron makapangutana ka nila kun unsay imong isumiter nga rekisitos ug kun pila ang minimum nimong bayran matag buwan. Hinaut nga akong natubag ang imong pangutana. Daghang salamat and God Bless. — Atty. Divine

Alang sa inyong pangutana ipadala lang sa Legal Corner sa Banat News or email sa [email protected] ug akong tubagon ang inyong pangutana matag adlaw'ng Miyerkules ug Domingo pinaagi sa akong column.