Aso sa sakyanan

Palpak gihapon ang atong kagamhanan sa pagpuo sa mga sakyanan nga magbuga og itum kaayo nga aso sa iyang tambutso.

Nasundan nako ang usa ka PUJ nga ang Plate Numbers GVH-424 (Rota 17B) nga nagtungas sa Veterans Drive paingon sa Marco Polo Plaza Hotel nga pwerte, mora’g nukos nga miikyas aron di madakpan.

Akong gihimo’ng ehemplo ang nukos kay kun maglangoy ni sa dagat unya makakita’g tawo, mokalit kini pagbuga og itum kaayo nga ata aron dili siya makit-an kun asa mopaingon.

Palihug tawon mga sakop sa City Traffic Operations Management (CITOM) nga gitugyanan sa paghimo’g kampanya batok sa mga sakyanan nga magbuga’g itum nga aso nga tan-awa ning maong PUJ.

Makasabot man ko nga ang sakyanan nga magtungas mobuga man g’yud og aso, apan kun ang kolor niini itum na kaayo timailhan na kini nga depektoso ang mao nga sakyanan.

Nagkinahanglan na kini og “general overhaul.” Ang tag-iya niining maong sakyanan akong hangyoon nga ipaayo intawon ang imong PUJ kay makaamong kini sa mga tawo nga makahanggap sa itum nga aso.

Daghan kining mao nga mga sakyanan nga magbuga og itum nga aso, apan kining PUJ nga akong gitug-an ang plate numbers maoy grabe sa tanan.

Maayo unta og tagdon kini dayon sa hingtungdan nga mga sakop sa CITOM.

* * *

Kaniadto, si Konsehal Nestor Archival miduso og kausaban sa ordinansa nga mosilot sa mga tag-iya og sakyanan nga magbuga og itum kaayo nga aso.

Awhagon nako si Konsehal Archival nga tan-awon niya kun angay pa ba nga pahugtan kining mao nga lagda. Daghan man gud sa mga tag-iya’g PUJ ang maayo lang mokumkom sa abang gikan sa ilang mga drayber.

Wala sila maghuna-huna nga tungod sa ilang kahakog sa salapi nga ingon sa mahadlok mogasto alang sa ilang sakyanan daghang mga tawo ang masakit kun makahanggap sa itum nga aso gikan sa ilang jeep.

Kini maoy rason nga bisan og mahal kaayo ang gasolina apan nag-antus ko nga mogamit lang g’yud sa akong sakyanan kay kun magmotor ko, hanggap nako ang tanang aso sa mga PUJ ug cargo truck.

Angay g’yud nga kun dunay masakpan nga sakyanan nga magbuga og itum kaayo nga aso dili na kini pabiyahion. Dad-on kini dayon sa impounding area ug ipagawas lang kun isumiter na og smoke test.

Dili ba maayo Konsehal Archival ug Konsehal Nida Cabrera?