Enero 2014 daghang kaso sa sunog!

Pagkadali ra gayud modagan sa panahon. Unang adlaw na man diay karon sa Pebrero 2014. Bag-ohay ra gani kita nagsugat sa bag-ong tuig ug nagsadya sa kapistahan sa Balaang Bata ug sa Sinulog milabang na man diay dayon kita sa ikaduhang buwan sa tuig.

Kay milabay na man kita sa buwan sa Enero 2014, mas maayo siguro nga hatagan nako ang publiko sa datos nga atong nahipos sa Office of the Provincial Fire Marshal Cebu Province diin atong itandi ang sunog sa milabay’ng tuig sa buwan sa Enero ug sa karong 2014.

Base sa atong nahipos nga datos, dunay 29 ka sunog nga natala sa tibook buwan sa Enero 2013 ug mitala kini og danyos sa kabtangan nga miabot og 2,884,350.00.

Ang nakaparat kay dako kaayo ang pagsaka sa sunog karong Enero 2014 ug miabot kini og 69 ug dunay danyos nga 3,091,700.00. Makaalarma kaayo ang maong pagsaka sa sunog dinhi sa probinsya sa Sugbo kay lagi subsob na man unta kaayo ang mga fire prevention campaign sa atong kabomberohan aron mamahimong taas na unta ang kaalam sa publiko sa mga angayang buhaton aron hingpit nga makalikay sa sunog.

Sa ako nang nahisgutan kaniadto, dili lamang responsibilidad sa atong kabomberohan ang paglikay sa sunog. Kinahanglan gyud ang aktibong partisipasyon sa publiko. Mag unsa man ang among mga pahimangno kun walay pagpakabana ang kadaghanan. Apan bisan pa man sa maong suliran, wala kami mohunong sa pagpahibaw sa publiko sa mga fire safety tips aron dili mamahimong biktima sa sunog.

Hinaut nga karong buwan sa Pebrero mokunhod na unta ang number of fire incidents kun atong itandi na unya sa sunod buwan.

Sa pikas bahin, hapit na kita mag -obserbar sa Fire Prevention Month 2014. Dinhi sa atoa sa Pilipinas, mao kini ang buwan nga magsugod ang grabeng ka init ug gani sungogon kita og sunod sunod nga sunog.

Apan kun dili mausab ang atong weather condition ug matud pa magpadayon ang epekto sa climate change diin ang kabugnaw sa panahon maoy atong masinati sa panahon sa summer puhon, mura’g maminos minos na siguro ang mga sunog anang mga panahona.

Sa kataposan, sa Lunes na Pebrero 3, 2014 ang kataposang adlaw sa among pagpanawat sa mga aplikante nga buot mahimong sakop sa Bureau of Fire Protection isip bombero. Bisita lang kamo sa rehiyonal nga buhatan sa BFP 7 nga anaa mahimutang sa N Bacalso Ave.,Cebu City. Sa atong mga kaigsoonang Insik ug Filipino-Chinese belated Kung Hei Fat Choi!