Pagtarong aron respetohan!

Tulo g’yud ka motorsiklo ang nangabalintong didto sa tungasan nga bahin sa Sitio Maracas, sakop sa Barangay Lahug, kaniadtong Biyernes sa gabii.

Diha pa ang usa sa mga drayber nga maayo’ng pagkahay-ad sa karsada samtang ang duha nagpamahid sa ilang mga pangus sa bukton ug ulo.

Dili g’yud ko mag-ukon-ukon pagsulti nga malipay ko magtan-aw niadtong mga hambugero nga drayber og motorsiklo nga maaksidente sa ilang kahambog.

Gitan-aw nako ang usa sa mao nga mga motor ug klaro kaayo nga expire na ang rehestro unya dili kompleto sa gikinahanglan nga kagamitan sama sa side mirrors.

Abi gani nako og ang usa sa mao nga mga motorsiklo mao kadtong hilabihan kahambugero nga drayber nga akong nasundan gikan pa sa Marco Polo Hotel nga pwerteng nakaikis-ikis pagpadagan. Kun makakita ko nga ang usa ka hambugero nga drayber og motorsiklo unya maaksidente, mohunong g’yud ko ug akong pikatan ug ingnon nga “maayo ra!”

Makakita man g’yud ko nga tungod sa kahambugero mopadagan sa uban, hapit na lang g’yud maigo sa mga sakyanan kay magsulod-gawas man sa mga sakyanan nga magdagan.

Kanang matanga sa mga drayber og motorsiklo mao na’y kuyaw kaayo kun maka-drive og mga sakyanan sama sa PUJ. Dili pagdaut sa mga PUJ driver, daghan kanila gikan sa habal-habal ug nakat-on pag-drive gikan sa motorsiklo.

Mao kana nga makita nimo mora ‘sab og nag-drive og motorsiklo kun mopadagan sa ilang mga PUJ.

Kun mag-drive lagi ko sa akong sakyanan  ug makakita sa abusadong mga drayber, dili nako tuyoon nga makaingon nga ignorante ug abusado ang mao nga mga tawo.

Gawas nga abusado mopadagan, dunay ubang mga tag-iya og sakyanan nga taptapan lagi nila ang plate numbers og “itum” gyud kaayo nga bildo. Kay kun may TOP pa lagi ko kaayo g’yung dakpon.

Dili g’yud ko malooy modakup ug mopamulta sa mga tawo nga ingon niana og batasan.Walay mga utok ang mao nga mga tawo. Dunay usa kanila nga polis kay nasundan nako nga naka-half uniform unya itum kaayo ang iyang plate number.

Dili ra ba g’yud ko moila og polis basta mopatuman na sa balaud. Matinahuron kaayo ko sa polis bisan og P01 pa ang ranggo basta makita nako nga sila nagtahud ‘sab sa balaud.

Apan kun ang mga polis walay tahod sa balaud, ngano gud tawon nga motahod ko nila nga daghan kanila dili man gani makamao manubag kun pangutan-on, gawas lang niadtong mga bright ug buotan.

Pasensya lang mo kun sakit-sakit ang akong pagkasulti kay angay lang ‘sab tingali pasakitan og sulti kadtong mga abusado. Ang mga abusado dili angay nga respitohan.